DONOSTIA
Bergarako alkateen mugimenduaren 30. urteurrenaren atarian eta 1931ko Lizarrako udalen batzarra gogoan hartuta, Udalbiltza berrantolatu eta berrosatzeko deia berretsi zien atzo Loren Arkotxak Euskal Herriko udal hautetsi guztiei. Gonbidapen hori Udalbiltzaren “Udal Hitza” aldizkari ofizialaren bidez zabalduko dute. Era berean, www.udalbiltza.net web orrian atxikimendua emateko tartea zabaldu dute.1931ko Lizarrako udalen batzarrarekin batera, Bergarako alkateen mugimendua, 1976ko uztailaren 21ekoa, «Euskal Herriaren burujabetza eta erakundetzearen alde udal hautetsiek egin duten lan luzean mugarri» bilakatu dela plazaratu zuen Arkotxak. Bi horiek Udalbiltzaren, «Euskal Herriko nazio instituzio bakarraren» aurrekariak direla gaineratu zuen.
Egungo egoerari aipamena eginez, «une berezia» dela adierazi zuen, izan ere, «Euskal Herriari eta euskal herritar orori eskubideak ekar diezazkiokeen prozesu politikoa abian da».
Horregaitik, beharrezkotzat jo zuen «urteetan eginiko lana» gogoratzea «aurrera proiektatzeko eta indar gehiago emateko». Gogoratzeaz gain, «adostasunak lortu eta konpromisoak hartzeko» garaia ere badela ohartarazi zuen Udalbiltzako presidenteak. Ildo horretan, nazio erakundeak herritarren eskubideen aitortzan, garapenean eta defentsan «konpromiso sendoa» hartu duela berretsi zuen.
Eskubideen artean, Euskal Herriak «bere burua antolatu eta erakundetzeko duen eskubidea lehentasuna» duela esan zuen. Testuinguru horretan kokatu zuen, hain zuzen, Udalbiltza berrosatzeko beharra eta, horrek «guztien arreta eta prestutasuna eskatzen» duela adierazi zuen Arkotxak.
Bihar Bergarako ekitaldian
Azkenik, «30 urte geroago, grina berarekin» jarraitzen duten alkate ohiak agurtu zituen eta esker ona eman zien. Hala, bihar Bergaran, alkateen mugimenduaren omenez egingo duten ekitaldian Udalbiltzaren ordezkaritza batek esku hartuko duela azaldu zuen.Euskararenofizialtasunaren, euskal preso politikoen amnistiaren eta ikurrinaren ofizialtasunaren alde egin zuten lana nabarmendu zuen.
