GaraAzkenak - Paperezkoa - English Edition  |  Le Journal
EUS | ES | FR | ENG
 » PAPEREZKOA
  -Aurkibidea
  - EuskalHerria
- Jendartea
- Ekonomia
- Iritzia
- Mundua
- Kultura
- Kirolak
 » AZKENORDUA
 » ENGLISH EDITION
 » DOSIERRAK
 » DOKUMENTUAK
 » IRUDITAN
 » HEMEROTEKA
 » Produktuak
Gara > Idatzia > Ekonomia 2006-10-19
Paueko Laborantza Ganberarako bozen kontaketa-sistema arbuiatu du ELBk
Urte hasierako hauteskundeetan parte hartuko du ELBk, Paueko Laborantza Ganberan eta nekazaritza egitura guztietan ordezkaritza izateko. Sindikatua, hala ere, ez da ados kontaketa sistemarekin, oraingoan departamenduko emaitzak soilik emango dituztelako. Prefetari kantonamenduka kontatzeko eskatu dio.

BAIONA

Departamenduko Laborantza Ganberarako ordezkariak izateko sei urtetik behin egiten dituzten hauteskundeetan parte hartuko duela azaldu zuen, atzo, Baionan, ELBk. Bide batez, boz horietarako Estatuan aplikatuko den kontaketa sistema egokitzeko eskatu du sindikatuak.

Izan ere, datorren urtarrilean egingo dituzten hauteskundeetan, kontaketa departamendu osokoa izango da eta ez, herriz herrikoa edo kantonamenduz kantonamendukoa. Lehen, boza herrietan bertan emateko aukera izaten bazen ere, 2001ean posta bidezkoa jarri zuten indarrean. ELBk sistema hori salatu zuen orduan, besteren artean, parte-hartzea izugarri jaitsi zelako. Horiek hala, gutuna igorri dio prefetari bozen kontaketa gutxienez kantonamenduka egin dezaten.

ELBko Christian Harlouchet-ek adierazi zuen berentzat biziki garrantzitsua dela jakitea sostengatzen duten nekazaritza proiektuak jaso duen babesa nola eta non banatzen den:«ELBrentzat eta gainerako sindikatuentzat premiazkoa da zein indar dugun jakitea, gure egitasmoak horren arabera egokitzeko. Dezentralizazio legeak horrenbeste aipatzen duen hurbileko demokraziaren haritik doa gure eskaera».

Biarnon ere bai

Biarnoko Confederation Paysanneko Michel Erbinek gauza bera esan zuen: «Guretzat berebiziko tresna da gure bilakaera ezagutzea, gerora egoera aztertu ahal izateko».

Hauteskundeetan parte hartuko dutela baieztatu zuen Harlouchet-ek: «Batzuek ez ginela aurkeztuko bazioten ere, gure ordezkaritza nekazaritza egitura guztietan baliatzeko asmoa dugu. Gainera, frogatu nahi dugu Euskal Herrian gehiengoa izaten jarraitzen dugula eta gure nekazaritza ereduak gero eta jarraitzaile gehiago dituela».

Kalitatezko ekoizpenak sustatzeko eta Euskal Herriko Laborantza Ganbera bultzatzeko, ordezkaritza ahalik eta handiena erdiestea oso garrantzitsua dela nabarmendu zuen Harlouchet-ek.


 
Inprimatu
...Albiste gehiago
Jendartea
«Gracias a que seguí haciéndome controles; si no, yo no estaba aquí»
Mundua
Tel Aviv presiona al pueblo palestino intensificando sus operaciones militares
Kirolak
Un «fallo» de cinco millones de euros
Ekonomia
Paueko Laborantza Ganberarako bozen kontaketa-sistema arbuiatu du ELBk
Euskal Herria
Batasuna destaca que el proceso vasco ya está en la agenda europea
  CopyrightGara | Kontaktua | Norgara | Publizitatea |  rss