DONOSTIA

Pobesen 290 kiloko lehen jardunaldia jokatuko dute. Txapelketa joan den astean abiatu zuten 330 kilotan, eta orduan erabatekoa izan zen Abadiñoren nagusitasuna. Ikusgai dago, beraz, pisu txikiagoan ere bizkaitarrek maila berean jarraitzen duten.

Etzi, beraz, 290 kilokoak neurtuko dira. Lehen multzoan, Abadiño A, Sokarri A, Gatika, Kuartango eta 6 Conceyos izango dira. Bigarren multzoan, berriz, Abadiño B, Sokarri B, Badaiotz, Auzolan eta Arrizkozubi. Esan beharrik ere ez dago joan den asteko erakustaldia eta gero, Abadiño dela faborito. Igandean, Aurtitzen izango dira.

Bertan neskak arituko dira 240 kilotan. Gaztedi A, Gaztedi B eta Girizia neurtuko dira. Egun berean eta leku berean, mutilak ere izango dira, baina aurten lehen aldiz Bigarren Maila izango da, talde berriei zuzenduta. 340 kilotan, Giriza, Izaskun, Algorta, Lau Sokan eta Amaiur neurtuko dira.

Nafarroan, aldiz, Zortzinakako Txapelketa ari dira jokatzen, eta etzi izango dira Lesakan, 17.00etatik aurrera. Bertan, mutiletan, 600 kilotan neurtuko dira. Amaiur A, Amaiur B, Beti Gazte, Berriozar eta Txantrea lehiatuko dira. Beti Gaztek badauka jadanik txapel bat, eta pisu honetan ere garaipen batekin abiatu nahiko du.

Nesketan, berriz, 520 kiloko bigarren eta azkeneko jardunaldia jokatuko dute leku eta ordu berean. Beti Gazte A eta B eta Sakana arituko dira. Azken horiek irabazi zuten lehen saioa, eta pisu honetako txapela lortzeko faborito dira.