ELBko bi ordezkariek ez dute Paueko Nekazal Ganberan parte hartuko
Lapurdi, Nafarroa Beherea eta Zuberoan laborarien lehen sindikatua izaten jarraitzen duelako bere poza agertuta, Paueko Laborantza Ganberan dagozkion bi eserlekuak ez dituela okupatuko esan du ELBk. Erabaki hori ez dela «liskarrak elikatzeko" hartua izan, Ipar Euskal Herriko laborantzak «berezko instituzioa, eskumenak dituena," behar duela berresteko baizik. ELBk hauteskundeen ostean eratuko den gobernuari eskakizun hori onar dezan eskatuko dio.
Maria AIZPURUA |
«ELBri garaipena kentzeko asmoz, zenbakien inguruko ohiko eztabaida gora behera», Zuberoa, Nafarroa Beherea eta Lapurdin ELBk laborarien lehen sindikatua izaten jarraitzen duela adierazi zuen, atzo, Baionan Mixel Berhokorigoinek.
Nekazarien sindikatuak gaur eratuko den Paueko Ganberan erdietsitako bi eserlekuak ez dituela beteko berretsi zuen, erabakiak «konfliktoa areagotzeko» helbururik ez duela argituta: «Euskal Herriko laborantzak eskumenak dituen benetako tresna instituzionala behar duela argiki aldarrikatzeko aspaldi hartutako erabakia da eta ELBk ez badu eskakizun hori bultzatzen ez du beste inork egingo».
ELBren zerrendaburuak nabarmendu zuen Ipar Euskal Herriko markoaren aukera, Departamenduaren hautua egin duten beste sindikatuena bezain «errespetagarria eta profesionala» dela.
Datozen hilabeteetan Estatu frantsesean egingo diren hauteskundeak ere hizpide izan zituen. «Iragan denborarekin hautsi eta gauzak aldatu behar direla esaten dute hautagai nagusiek. Hortaz, guk diogu Euskal Herriko laborantzaren beharrei erantzuteko eta berezko tresna behingoz onartzeko», erantsi zuen Berhokoirigoinek, bide batez, Euskal Herriko Laborantza Ganberari lanean utz diezaiotela eskatuz.
Era berean, Euskal Herrira etorriko den hautagai oro, Ainize-Monjelosera gonbidatu zuen, EHLG gertutik ezagutzera.
Gazteen freskotasuna
Mixel Oçafrainek, berriz, ELBren kanpainaren eta emaitzen balorazio baikorra egin zuen: «Laborariek emandako sustenguak eta elkartasunak, geroari begira izugarrizko konfidantza emateaz gain, ELBren proiektua ondo ulertua izan dela adierazten du». Laborari gazteen parte hartzeak, gainera, sindikatuari «freskotasuna eta dinamika» ekarriko diola gehitu zuen.