CADE ingurumena babesteko elkarteen kolektiboak, LAB sindikatuarekin batera, berriz ere AHT tren linea berria eraikitzeko proiektua ulergaitza dela salatu zuten atzo; izan ere, apirilaren 14an Hendaian AHT proiektuaren aurkako manifestazioa izanen da.

Alde horretatik, RFF Estatu frantseseko burdinbide sarearen kudeatzaileak zabalduriko datuetan gezurra nabari dela aipatu zuten. Victor Pachon eta Jeronimo Prieto bertan zeuden, eta burdinbide berriaren proiektuarekin bat egin duten lekuko hautetsiak okertuta daudela esan zuten.

Berriz ere, Hendaia eta Bordele lotzen dituen tren lineak RFFk aipatzen duen tren emendatzea baino gehiago har dezakeela nabarmendu zuten. Alde horretatik, proiektuari buruzko Eztabaida Publikoan suitzar adituek esandakoa azaldu zuten. «Eztabaida publikoaren laburpena egiterakoan, RFFk suitzar adituek eman datuei ez die inolako garrantzirik eman, eta 2020ari begira izanen den tren kopurua emendatu du», erran zuen Jeronimo Prieto LAB sindikatuko kideak.

Eta, suitzar adituek esandakoa gogorarazi zuten: «Orokorrean, 2020ari begira aipatzen diren salgai trenen emendatzeak oso positiboak dira. Zuhurrago izan beharko lukete». Aurreikuspen onenetan ere, egungo lineak emendatzea bere gain hartzen ahal duela adierazi zutela nabarmendu zuen: «2020 urteari begira, berrikuntza lan txikiak eginez, RFFk aipatzen duen tren kopurua egungo lineatik pasatzen ahal da».

Aurreikuspenak behera

Suitzar adituek emandako bi datu horien garrantzia nabarmendu zuten, beraz, LABek eta CADEk. Baina, horiez gain, beste bi elementu agertu zirela erran zuten. Alde batetik, berriki SNCF tren sarearen Estatu frantseseko kudeatzaileak egindako adierazpenak aipatu zituzten. Guillaume Pepy egituraren zuzendari nagusiak tren linea berri horren eraikuntzak Paris zeharkatzeko arazo nagusi bat izanen duela adierazi zuen. Eta, zuzenean trenetan joanen diren kamioiek ezingo omen dute Orleansetik at joan. «Horrek RFFk aipaturiko salerosgai trena emendatzea bitan zatitzen du», argitu zuten CADEko eta LABeko kideek. Gainera, horrelakoak Eztabaida Publikoa bukatu eta gero erran izana salatu zuten.

Bestalde, lekuko hautetsi askoren usteak deuseztatu zituzten; izan ere, linea berria egiterakoan ez dutela tunelik eginen nabarmendu zuten. «Fisikoki pentsaezina da linea berria lurpetik pasatzea Uztaritzetik Senpere arte. Gainera, teknikoki bost kilometroko tunela egitea ezinezkoa da. Frantses legearen arabera, salerosgaien eta bidaiarien trenak ezin baitira gurutzatu neurri horretako tunel ba- tean», adierazi zuen Victor Pachonek. Bi ordezkarien ustez, argi da linea berria bidaiari trenak pasarazteko baliatuko dutela eta gehienak ez direla Ipar Euskal Herrian geratuko.