«Larderia», «boterearen gehiegikeria», «hautetsien eremuan esku-sartze jasangaitza». Hitz gogorrak erabili zituzten atzo goizean, Baionan, Euskal Herriko Laborantza Ganberaren (EHLG) alde lan egiten dutenek, abenduaren 2an Pirinio Atlantikoetako prefetak emandako urratsaren berri eman ostean.

«Zalantzarik ez dut aginte publiko baten gordetzaile zaren heinean erakunde publikoen funtzionamendua kaltetzeko bidean legearen kontra doan edozein ekimen saihestea barneraturik duzula». Horixe da Philippe Rey prefetak idatzi duen gutunaren azken paragrafoan irakur daitekeen mezua.

Maryse Cachenaut, EHLGko lehendakariordeak kazetarien aurrean azaldu zuenez, «ezin sinetsizko» auzia da heldu den urtarrilaren 29tik aurrera Baionako Auzitegian eginen dena. Izan ere, haren ustez, elkartzeko eskubidea, laborantza herrikoi eta iraunkorra aitzineratzeko herri engaiamendua eta adierazpen askatasunerako eskubidea ere urratzen baititu auziak.

2005ean ere, EHLG sortzear zela, garaiko prefetak euskal hautetsiei laborarien antolakuntza berria ez sostengatzeko gonbita egin ziela gogora ekarri ondoren, oraingoan Philippe Rey-ek idatzi duen eskutitzari idatziz erantzungo diotela iragarri zuen. Era berean, EHLGk aholkularitza juridikora joko du, hautetsien gainean egin den presioa «botere gehiegikeria» izan ote daitekeen argitzeko.

Horrez gain, EHLGren lanak hasieran herritarrengandik eta, azkenaldion baita botere publikoen aldetik ere -esaterako, Akitaniako Eskualdeko Kontseilua-, lortu duen sostengua nabarmendu zuen Cachenaut-ek.

Dominique Amestoy laborariak, bestalde, Euskaldun Gazteriaren garaiaz geroztik ezagutzen duela Berhokoirigoin aipatu zuen. Baita gaineratu ere, 30 urte hauetan «beti euskal laborantza laguntzen, babesten, tiratzen» ikusi duela.

Laborantza Ganberaren Lagunen elkartearen izenean Patxi Noblia eta Txetx Etxeberri mintzatu ziren. Lehenak gogorazi zuen urria erdialdean eginiko batzar nagusian hiru norabideko ekimenak onartu zituztela, hala nola: EHLG jasaten ari den erasoaren berri ematea Estatu frantses osoan, eta horren aurrean sostengua galdegitea; Iparraldeko gizarte zibilarengan «100en manifestua»ren haritik auziaren aitzinean elkartasun uholdea zabaltzea; eta, hirugarrenik, hautetsien aldetik sostengua zabaltzea.

Hexagono mailan ehunka sinadura eskuratu dituztela nabarmendu zuen Nobliak. Finean, «prefetaren mehatxuak EHLGren aldeko elkartasun sarea berpizteko balioko duela» espero duela aitortu zuen Txetx Etxeberrik, eta «tokiko militanteei guziei» heldu den larunbat goizean, 10.00etan, Ainhizen egitekoa den bilerara joateko deia egin zien.