Joan den ostegunean aztertu zuen Auzitegi Nazional espainolak Joseba Permach, Joseba ALvarez, Juan Cruz Aldasoro eta Rufi Etxeberria mahaikideen behin-behineko espetxeratzea. Fiskalak guztiak kartzelan mantentzea eskatu zuen eta Etxeberriari izan ezik, gainerakoei espetxealdia luzatzea erabaki du auzitegiak.

Oiartzuarra izan da kalera atera den bakarra hurrengo hilabetean behin-behineko espetxealdian gehienez egin ahal diren lau urteak betetzear zegoelako. Permachi, Alvarezi eta Aldasorori dagokienez, ordea, kartzelaldia luzatzea erabaki du. Urriaren hasieran bi urte beteko dituzte hirurek preso eta beren aurka egingo duten epaiketaren inguruko data ez dago oraindik zehazturik.

Alvarez urriaren 2an atxilotu zuten Donostiako estropadetako manifestazioan izan ziren istiluekin lotuta, eta bi egun geroago Segurako polizia operazioa gertatu zen. Sarekada horretan atxilotu zituzten Permach eta Aldasoro ezker abertzaleko beste hainbat buruzagirekin batera.

Auzitegi Nazionalak mahaikideek kartzelan segitu beharko dutela erabaki du, horiek «ihes egiteko arrisku handia» dagoela argudiatuta 10 eta 14 urteko kartzela zigorrak jaso ditzakete-eta. Permach, Alvarez eta Aldasoro 35/02 sumarioan auzipetuta daude beste hainbat lagunekin batera, «ETAren agindupean» aritzea eta herriko tabernen bitartez hura finantzatzea leporatzen diete.

Delitua egiten jarraitu

Epaitegi bereziaren arabera, hiru mahaikideek «Batasunan izandako jardueragatik ETAren parte direla uste izateko nahiko arrazoi daude». Ildo horretatik, hiru politikariak aske utziz gero, delitua egiten jarraitzeko arriskua dagoela ondorioztatu dute.

Estatu espainoleko Auzitegi Nazionalaren ebazpenak dioenez, baliteke Permach, Alvarez eta Aldasoro libre geratutakoan «Batasuna eta hori ordezkatzen saiatzen diren antolakundeek espainiar gizartean presente jarraitzea ETAk bere delituzko jarduerari eusteko».

Bestalde, astelehenean aske gelditu zen Etxeberriari pasaportea atxiki dio Auzitegi Nazionalak eta astero epaitegi batera joan behar izango du sinatzera.

Etxeberria libre uztea erabaki behar izan zuen epaitegi bereziak behin-behineko espetxealdiko gehienezko lau urteak betetzear baitzen. 2007ko urrian atzeman zuten arren, Aldasoro eta Permachekin batera, aurretik auzi bera zela-eta beste bi urte ere eman baitzituen kartzelan, 2002. urteko maiatzaren 3tik 2004ko apirilaren 23ra.

Aralarrek ezker abertzaleko ordezkarien espetxeratzeak luzatu izana gaitzetsi zuen atzo prentsa ohar baten bidez. Salatu dutenez, ez dago ihes egiteko arriskurik «hiru pertsona horiek aspaldi erakutsia baitute herri hau defendatzeko eta hemendik bertatik lan egiteko konpromisoa dutela».