Isiltasuna eta iluntasuna. Horixe da euskal musikaren industriarik gabe gelditzen dena. Horrela irudikatu nahi izan zuten atzo Bilborocken bildutako sektore honetako 45 enpresa ingurutako ordezkariek. «Zure musika, gure lanbidea» lelopean sortu dute Euskal Herriko Musika Industriaren Plataforma (EHMIP) eta gizarteari eta, batez ere, instituzioei mezu zuzena helarazi nahi izan zieten: industria sektore bezala errekonozitzea eta, krisi garai hauetan, murrizketa bortitzenak kultura arloan egin ordez (%30-70 jaitsi dira aurrekontuak), murrizte horiek modu ekitatiboan banatzeaz gain, sektoreari laguntza eskaintzea.

Sektore guztiz «atomizatua» izan arren, gaur egun ehun enpresatik gora biltzen dituela adierazi zuten. Horiek mila enplegu zuzen sortzen dituzte (ekoizpen enpresak, agentziak, management, kontzertu-aretoak, diskoetxeak, grabazio-estudioak, teknika eta azpiegitura enpresak...), eta horiez gain, 500 musikari profesional, ikuskizun-teknikoak eta makina bat zeharkako enplegu dago jarduera honekin harremanetan. «Ez dakigu zenbat, baina badakigu lanpostuak galtzen ari direla. 2010. urte gogorra espero dugu, enpresak ixten joango dira», esan zuen Jose Angel Serranok, Producciones Serranoko arduradunak.

Plataformako parte dira, besteak beste, ABS Iluminación, Ama Lur, Arlan, Audiomic, Baga Biga, Balea Musika Ideiak, Discos Suicidas, Gazteok, Kap produkzioak, Radiation, Txalupa eta Ingunza Audiovisual. Atzokoa izan zen EHMIPren lehenengo aurkezpen ofiziala baina iazko irailetik ari dira lanean. Igor Otxoak, Oreka TX-ko eta EUPREL euskal promotoreen elkarteko kideak irakurritako manifestuan, euskal musika industriaren sektorea «langile profesionalez eraturik dagoela» aitortu zuten, «urterik urte jarduera horretan espezializatu egin direnak. Hori dela eta, gizarteari eta ordezkari politikoei gogora ekarri nahi diegu eszenan agertzen den musikari bakoitzeko, gutxienez hamar pertsona ari direla lanean musikaren magia plazaratzeko: promotoreak, soinu eta argi teknikariak, muntaiaren, segurtasunaren, administrazioaren eta komunikazioaren arduradunak...».

Bestalde, krisi garaietan kaltetuena kultura izan ez dadila eskatu zuten. «Jakin badakigu gure jarduera saio berrietara moldatuko dela, baina errespetua eta laguntza eskatzen ditugu bide berri honi ekiteko ezinbestekoak diren baldintzak kontuan harturik». Izan ere, egoera hauetan ematen diren irtenbideetan «sekulako aldea» dagoela salatu nahi izan zuten. «Nola izan daiteke auto eta altzairuen industriari laguntza zuzenak ematea, euskal musika-industria baztertzen den bitartean? Kontuan izan gure lanak badituela ezinbesteko onura immaterialak, baita gure ekonomian islatzen diren etekin bikainak ere. Gure musikagintzan inbertitzea errentagarria izateaz gainera, beharrezkoa da». Murrizketak ezinbestean egongo direla ulertzen dutela aitortu zuten, baina beste sektoreetan baino «bortitzagoak» direla salatu zuten.

Konponbideak

Aurrera begira, soluzioen bilaketan parte hartu nahi dutela adierazi zuten. «Eskua luzatzen dugu konponbideak bila ditzagun, egoera zail honetan. Gure burua eskaintzen dugu hausnartzeko eta alternatibak aurkitzeko, datorkigun paisaia berriari aurre eginez». Bide horretan, eskaera garbia egin zuten: «Aurreneko urratsa izan dadila gaur martxan dauden programa musikal guztiak bertan behera ez uztea eta gure iritzia kontuan izatea jarduera honen partaide baikara».

Dagoeneko hainbat bilera egin dituzte instituzioekin, horien artean, Gipuzkoa eta Arabako Aldundiak, Eudel eta hainbat alderdi politiko. Ezezkorik ere jaso dute, salatu zutenez, PSEk, EAk eta Bizkaiko Aldundiak ez diete euren eskaerari erantzun. Nafarroako instituzioekin ere harremanetan jartzeko asmoa dute. Bilera horietan sektoreari buruzko «ezjakintasun handia» topatu dutela esan zuen Otxoak. «Enpresa txiki asko gara eta lanpostu asko sortzen ditugu. Baina ez dira kontziente benetan daukagun garrantziaz eta guretzat krisiak suposatzen duenaz. Lehenengo harremana izan da eta espero dugu proposamen zehatzekin jarraitzea». Aurrerantzean, bestelako arazoei ere heldu nahi die plataformak. «Krisiak gogor jotzen gaituen momentu konkretu honetan sortu da baina kontziente gara Euskal Herrian kulturaren arazoa hortik harago doala. Espero dut etorkizun batean, euskal musika eta kulturan ditugun arazo sakonei aurre egiteko balio dezakeela», gaineratu zuen Otxoak.