Pasa den larunbatean zendu zen Joxe Agirre bertsolariaren omenezko saio berezia prestatuko du ETB-1k astebururako. Bertan, plazaz plaza bildutako bertsoaldiak ardatz hartuta, izan zen bertsolari handia oroituko dute.

Joxe Agirre Orandak bere ibilbidean zehar parte hartutako emanaldi batzuk hautatuko dituzte «Hitzetik Hortzera» programaren edizio berezia egiteko. Irudi horiekin batera, bertsolariari buruzko iritziak jasoko dituzte «Joxe Agirre, Izarraizko azeria» saioan.

Emanaldi honi esker Orandaren bertsokeraz gozatu ahal izango dugu, puntuei erantzuten emandako gaiei, zein bakarka. Horrekin batera, duela urte batzuk Manuel Sein Xanpun, Jon Azpillaga eta Joxe Lizasorekin batera Rezola sagardotegian egindako mahai-jirako eta ondorengo tertuliako pasarte batzuk berriro ikusiko ditugu.

Saioa borobiltzeko, kideak zituen bertsolari zahar zein gazteek berari buruzko iritziak emango dituzte, hala nola Imanol Lazkanok, Arrate Illarorek, Amets Arzallusek edo Xabier Euzkitzek.