Musharraf presidente ohia Quaid e Azam aireportura iritsi zen eguerdian, Emirates hegazkin konpainiaren hegaldi batean. Bertan milaka jarraitzailek egin zioten harrera, baina APML Pakistan Osoko Liga Musulmana alderdiak iragarritako 100.000 pertsonara iritsi gabe, Geo eta Dwan tokiko komunikabideek jakitera eman zutenez.

Lau urte egin ditu erbestean Musharrafek, tentsio handiko momentuan herrialdea uztea erabaki ondoren, eta atzo ere tentsioa zen nagusi Karatxin. Normaltasun itxurarik eskaintzerik ez zuen izan presidente ohiak, talibanek hiltzeko mehatxua egin baitzioten, eta horrek jeneral kolpistaren agenda erabat aldatzea eragin zuen: iragarrita zeuden prentsaurrekoa eta ekitaldi politikoa bertan behera utzi zituzten.

Musharraf estatu kolpe bati esker iritsi zen agintera 1999an, eta bertan jarraitu zuen 2008ra arte. Kargua utzi behar izan zuen, nahiz eta berak bertan jarraitzeko ahalegin ugari egin zituen. Azkenean, Parlamentuan bere aurkako indar korrelazioa zegoela ikusita, herrialdea uztea erabaki zuen.

Orain Pakistanera itzuli da, maiatzeko hauteskundeetan esku hartzeko. Karatxira eraman zuen hegazkina Dubaitik irten zen. Bera alkandora zuri luze bat jantzita zegoen. Ondoan zituen jarraitzaileek «bizitza luzea Musharrafi» oihukatzen zuten hegaldian, bertan ziren kazetariek jakinarazi dutenez.

Jarraitzaile gehienak Londresen igo ziren hegazkinera, Musharrafek berak azken urteotan denbora gehien egin duen hirian. Horietako bat zen 28 urteko Hasan Askari. Askarik berak France Presse berri agentziari esan zionez, «Musharrafek egonkortasuna eramango du Pakistanera».

Bertako analistek esan dute presidente ohiak ez duela gauza handirik lortuko hauteskundeetan. Horixe esan dio Efe agentziari Humayun Khan Islamabadeko Defentsa Unibertsitate Nazionaleko irakasleak: «Musharrafek helburu politiko handiak dituela esan arren, bere alderdiak ez ditu Parlamentuan eserleku asko izango. Bere itzulerak oihartzuna izango du hedabideetan lehen egunetan, baina hortik aurrera bere eragina oso txikia izango da, boto-emaileen artean duen sostengua oso txikia baita».

Hala ere, presidente ohiak poza adierazi nahi izan zuen atzo. Sare sozialetan hegazkinean egindako argazkiak eskaini zituen, hauteskunde kanpaina hasitzat eman duela aditzera emanez. «Ez nago urduri, baina kezkatuta bai, aurrean ditugun erronkak direla-eta», esan zuen hegazkinera igotzean. «Terrorismoa, muturreko jarrerak, prozedura judizialak eta hauteskundeak» lirateke erronkak. «Der Spiegel» Alemaniako astekariari esan dio «terrorismoa» amaiarazi nahi duela.