Realak bere kapitaina galduko du udan. Foiletoi luzeak amaiera izango du, klubak eta Aitor Lopez Rekartek, jokalariaren kontratuaren berritze automatikorako klausula deuseztatzea akordatu baitzuten larunbatean.

Berak ez du uste foiletoi bat izan denik, baina istorioak zenbat iraun duen eta zer nolako gorabeherak izan dituen kontuan hartuta, horrelakoa dirudi. Denboraldi osoan etengabe azaldu dira arrasatearraren jarraitzeari buruzko galderak. Eta galdera horiek erantzuna aurkitu zutela zirudienean -Montjuicen Aitorrek bere denboraldiko 22. partida jokatu zuenean-, Miguel Fuentesek kapitulu berria hasi zuen, jokalariaren kontratuaren klausula oraindik betetzeke zegoela esan baitzuen.

Aitorrek ez zion garrantzi gehiegirik eman nahi izan une hartan, baina argi zegoen arazo bat zegoela, Realak jokalaria berritzeko azaldutako gogorik ez zuela kontuan hartuta.

Jokalariak berak, noski, sentsazio berbera zeukan baina bere bizitzako klubaren nahiak lehenetsi nahi izan ditu. Hala, konponbidea bilatzen saiatu da eta azkenean klausula famatuari uko egin dio.

Atzo azaldu zuenez, klausula hori klubarentzat «zama bat» zela konturatu zen unean hartu zuen erabakia Aitorrek. «Neretzat baino, klubarentzat karga bat zen klausula hura, nik aspaldi sinaturik neukan zerbait zelako. Eta hoberena klubari zama hori kentzea zen», esan zuen. «Zama» hori zegoela, «lerro artean irakurri genezakeen zerbait zen, eta jokalari eta kapitain bezala taldearen mesederako dudan hoberena ematen saiatu behar dut beti. Nire erantzunkizuna horrelako gaiak kaltegarriak ez gertatzea da, eta batasuna sustatzea».

Gauzak horrela, eta Reala egun bizitzen, edo sufritzen, ari den egoera kontuan hartuta, «erabakirik egokiena hartu dudala», uste du jokalariak. «Une honetan, azken txanpa konzentrazio osoz bizi behar baitugu». Ildo horretan, Aitorrek argi dauka «garrantzitsuena Reala Lehen Mailan egotea da. Eta ni horretarako dudan guztia ematen saiatuko naiz».

Etorkizuna

Horixe da etorkizunari begiratzerakoan atzelariari axola zaion bakarra. Aitorrek berak irailetik aurrera non jokatuko duen «ez dauka garrantzirik oraintxe; orainaldia da garrantzitsuena». Hala ere, «ezin dituzu inongo ateak itxi; ekainaren 30etik aurrera libre gara guztiok, gure erabakiekin».

Argi dirudiena zera da, etorkizun hori Realetik urrun dagoela, jokalariak ez baitu, klausula famatuaz kanpo, bere kontratua luzatzeko proposamenik. «Eta, agian, nahiago dut hori momentu honetan», esan zuen.