Nahiko helburu zailari ekin behar dio Osasunak gaur arratsaldean. Alde batetik, UEFAko kanporaketa alde batera utzi eta, errekuperazio azkarra eta bikoitz -fisiko eta psikologikoa- baten bidez, Ligan lasaitasunari eusteko beharrezkoa den garaipena eskuratu.

Hor dago, ziur aski, aurkariak sor ditzaken arazoetan baino, gaurko partidaren muina. Gorritxoek askotan esan dute denboraldian UEFA beren ilusioen agertokia izan dela eta Liga, aldiz, betebeharrena. Esatea, baina, frogatzea baino errezagoa da. Saria hain gertu edukita, sekulako desilusioa hartu zuten nafarrek ostegunean, eta ez da gauza erreza motibazioa berreskuratzea oraindik hain denbora gutxi pasa denean. Batez ere, Europan gauzak ondo joan direnean Osasunak beti ez duela lorpen horien islada Ligan lortu ikusita.

Alde fisikoari dagokionez, antzerako zer edo zer gertatzen da, konponbideak errezagoa dirudien arren. Intentsitate handiko partida jokatu zuen taldeak Sanchez Pizjuanen eta, noski, ondorioak daude. Zelairatu ziren gehiengoen nekea eta, zoritxarrez, batzuen lesioak. Horixe da Ludovic Delporteren kasua -denboraldiko seigarren zuhuntz-hausdura izan zuen ostegunean-, baita partida aurreko saioan mindutako Savo Milosevicena ere. Atzo, Pierre Webok eta Enrique Corralesek hutsuneen zerrenda loditu zuten, arazo fisikoak zirela medio.

Ohizko konponbidearekin saiatuko da Jose Angel Zigandak; hau da, txandatzeak. Izan ere, entrenatzaileak sei aldaketa egingo ditu hasierako hamaikakoan: Javier Flaño, Monreal eta Juanlu defentsan, Juanlu zelai-erdian eta Valdo eta Soldado aurrealdean arituko dira Mallorcaren aurka.

Aldaketa horiekin eta azken egun hauetan egin omen duen lan psikologikoarekin, Ziganda entrenatzaileak taldearen indarberritze bikoitza eragitea nahi du. Bikoitza, azkarra eta ezinbestekoa, Osasunaren egoera Ligan ez baita batere ona. Azken aste hauetan, UEFAko gehiegikerien faktura ordaindu omen du etxeko txapelketan eta horrek hain zuzen ere, denboraldiko azken jaurdunaldi hauetan sufritzera kondenatu dezake Jose Angel Zigandaren taldeak.

Gaur motibazio gehegirik edukiko ez duen talde bat izango dute aurkari, 42 puntu lortu ondoren, Mallorcak bere helburua bete baitu. Partida, hala ere, ez da erreza izango, Goyo Manzanoren taldea sendo ari baita zelaian. Urtarrilean galdu zuen Mallorcak azkenengo aldiz; izan ere, Ono Estadin izan zen.