Gaur arratsaldean jakingo dugu Eibarko Astelena pilotalekuan (18.15, ETB1) aurtengo Buruz Buruko Txapelketaren final nagusia jokatuko duen lehen pilotariaren izena: Patxi Eugi edota Abel Barriola. Azken urteetan arazo asko gainditu behar izan dituzten bi txapeldun nor baino nor Eibarko pilotalekua berpiztuko duen egun berezian.

Abel Barriola da katedrarentzat faborito nagusia. Leitzakoa behe-behetik hasita sekulako txapelketa osatzen ari da, eta orain dela hamabost egun Martinez de Irujo ahalguztidunaren aurka lortutako garaipenaren ondotik, aurten txapela janzteko hautagai nagusi bilakatu da Olaizolaren baimenarekin.

Apirilaren 6an Enrike Galartzari 22 eta 7 irabazi zionetik, Barriolak garaitu besterik ez du egin. Xala (22-11), Peñagarikano (22-11) eta Irujo (22-20) utzi ditu kalean Leitzako atzelariak, eta gaur irabaziz gero, bere bigarren finala jokatuko luke lehen mailako Buruz Burukoan; izan ere, 2002an txapeldun irten zen. Bat jokatu eta bat irabazi.

Asperekin negoziazio zailak izan ondoren, Abelek urte bakarrerako kontratua sinatzea erabaki zuen orain hilabete gutxi. Errazkeriak alde batera utzi eta, bere eskuen osasunean konfiantza betea duela erakutsita, hamabi hilabete horietan maila goreneko pilotaria dela frogatzeko erronkari parez pare heldu zion ausardia handiarekin.

Oraingoz eskuek bikain erantzun dute, eta Lau eta Erdikoan eman zuen maila bikainari eutsiz, finalean sartzeko azken oztopoa bakarrik falta zaio nafarrari. Bidean Xala eta Irujo utzi ditu, enpresako bi pilotari onentsuenetakoak, eta finalean sartzea ibilbide luze baten merituz betetako amaiera litzateke.

Eugi, gaztetuta

Baina Barriolak Patxi Eugi izango du aurrean, aurtengo ezusteko pozgarrienetako bat, eta galtzeko ezertxo ere ez duen pilotaria. Hogeita hamasei urteko agoiztarrak, azken aukerak gerturatzen ari direla ikusita, hil edo bizi prestatu du aurtengo lehiaketa, eta, beti sasoi ona izan arren, inoiz baino finago heldu da azken txanpa honetara.

Deigarria izan zen final-zortzirenetan Asier Olaizolaren kontra jokatutako partida gogorrean Eugik erakutsi zuen prestakuntza bikaina, eta hori izan zen, hein handi batean, bere garaipenaren (22-15) gako nagusia. Gainera, bi aste izan zituen Ruben Belokiren aurkako final-laurdena prestatzeko, eta hori ere oso ongi etorri zitzaion betiko aurkaria kanpoan utzi (22-15) eta horren garesti dauden finalerdietan sartzeko.

Barriolari gertatu zaion moduan, badirudi Patxi Eugik ere gainditu dituela azken urteotan behin baino gehiagotan zigortu izan duten eskuko arazoak. Minak jota, hilabeteetako geldialdi luzeak egin behar izan ditu behin baino gehiagotan, eta horrek nabarmen eragin du agoiztarraren jokoan.

Gezurra dirudien arren, txapelketaren fase erabakigarrietan askotan ibili baitira biak, behin bakarrik neurtu dituzte indarrak Buruz Burukoan. 2004an izan zen, Tolosan jokatutako final-laurdenetako partidan, eta Eugik aise menderatu zuen Barriola 22 eta 4ko emaitzarekin. Gaur garaile irtenez gero, hiru aldiz txapeldun izandako Patxi Eugik bere seigarren finala jokatuko luke denboraldiko lehiaketa garrantzitsuenean.

Pilotalekua, albiste

Baina lehian arituko diren bi protagonistez gainera, gaur beste albiste nagusi bat ere izango da hizpide; pilotalekua, hain zuzen ere. Eibarko Astelena pilotaleku historikoak ateak zabalduko ditu bi urtean erabat itxita egon eta gero. Gehiegi atzeratu den albiste on bat pilota mundurako.

Astelenak 2005eko maiatzaren 1ean hartu zuen azken pilota jaialdia, eta frontoiaren jabeek diru gehiegi eskatzen zutela- eta, Aspek igandetako partidak Bergaran jokatu izan ditu azkenaldian. Aipatutakoak kontuan hartuta, sarrera oso ona espero da gaur Eibarko pilotalekuan.

Diruari dagokionez, apustuak nabarmen irtengo dira Abel Barriolaren alde, hogeita hamar ehuni, gutxi gorabehera. Edozein modutan, Leitzakoak behin baino gehiagotan aipatu du diruak ez dituela partidak irabazten, eta berak Irujoren aurka jokatutako norgehiagoka izan daiteke adibide onena.