1920ko hamarkadako Londres iluna eskenatokitzat hartuta, Mack Labana alproja entzutetsuaren gaineko obra da «Lamaiko Opera» (Bertolt Brecht, 1928), Eibarko Matrallako eta Lekeitioko Arrakala irratien ekoizpenaren bidez orain Arrosa Sareko hedabideetan euskaraz -eibarreraz, zehazki- entzun ahal izango dena.

Oier Gorosabel irratikidearen esanetan -eibartarra jatorriz, Matrallakon ibilia eta orain Lekeition bizi eta Arrakalako partaide dena- urteen joanak ez dio gaurkotasunik kendu obrari: «Toki eta une zehatz batean egon arren, kontatzen dena pertsonen arteko biolentziazko istorioa da, gizon eta emakumeen arteko harreman bortitza, eskaleen erlazio basatia... Mack Labana bera gupidagabea da, eta bada enpresagizon bat eskaleak arropa zaharrekin eta protesiekin hornitu eta kalean banatzen dituena euren jardunarekin etekinak ateratzeko. Pobreziaren enpresagizona da, ba al da hori baino gauza gaur-gaurkoagorik?».

Liburuxka eskuartera iritsi bezain laster ekin zion Gorosabelek itzulpenari eta irrati-nobela formatuan aurkeztea otu zitzaion: «Eibarrerara itzuli nuen eta zuzenketak Serafin Basaurik egin zituen, herrian baitugu halako `eibartzaindia' gisako bat. Zentzuzkoa zirudien antzezleak ere herrikoak izatea, eta hala jarri ginen harremanetan Matrallakorekin».

Zazpi borondatezko bilatuta, irakurketa lanak egin -«urdaiazpiko eta ardoaz lagunduta, jakina»- eta 20 orduko muntatze-lana etorri zen. Emaitza zortzi ataletan -20 minutuko iraupena du bakoitzak- banatutako irrati-nobela da, eta emanaldi bakoitzak hiru atal ditu: sarrera edo aurreko ataletako laburpena, pertsonaien elkarrizketak eta jatorrizko operaren zatia alemanez -1958an Berlinen Wilhelm Bruckner-Ruggeberg-ek zuzendutakoa erabili dute-. Zatien arteko loturak egiteko, kantu nagusia hartuta egin diren egokitzapenak -Joe Pass, Louis Armstrong, Tijuana in Blue, Oskorri, Ruben Blades...- erabili dituzte.

Arrakalak eta Matrallakok urrian emango dute ekoizpena, baina Arrosa Sareko gainerako kideek jadanik eskuratzeko moduan dute lana eta Gorosabelek erabiltzeko deia egin die irrati libreei.