Jaroslav Plasil erdilari txekiarra izan zen Osasunak atzo Taxoaren egindako entrenamenduko nobedade nagusia. Izan ere, Monako taldeko jokalari ohia lehen aldiz aritu baitzen taldekide berriekin batera. Gainera, gorritxoen kirol instalazioetan ikusitakoaren arabera, Plasil egoera fisiko egokian dago, eta Zigandaren taldean edozein unetan sartzeko moduan dagoela erakutsi zuen.

Larunbatean aurkeztu ondoren, txekiarra Monakora itzuli zen. Bertan, Euskal Herrira behin betiko trasladoa egiteko gauzak antolatu behar izan baitzituen. Horregatik, Plasil ezin izan zen egon igandean Osasunak Bilbon jokatu zuen norgehiagokan.

Arratsaldean, berriz, Romero, Puñal eta Monreal, minduta, ez ziren aritu.

Bestalde, Antonio Puertaren tragediak oihartzuna izan zuen Taxoareko prentsa aretoan. Izan ere, andaluziarra Hector Font-ekin, Juanfranekin eta Miguel Flañorekin batera ibili baitzen Estatu espainoleko selekzioaren azpiko mailetan.

Sevillako jokalariaren senitarteko eta lagunei «doluminak» bidali zizkien Flañok. Atzelariak 2004ko Mediterraneoko Jokoetan taldekide izan zuen Puerta. «Oso minduta» zegoela adierazi zuen. Gainera, oraindik ez duela sinisten, «oso mutil irekia» zela, eta «jende ona» zela nabarmentzeaz gain, batez ere heriotzak «fisikoki oso indartsua» zen mutil bat jipotzeak «harritu» duela azaldu zuen.

Taldekide guztiak «oso hunkituta» daudela ziurtatu zuen Flañok, bai eta horrelako egoeretan daukaten gauza guztiez jabetzen direla ere. Azkenik, noaindarrak adierazi zuen: «Horrelako oinazea izatean futbolak ez du inongo garrantzirik».

Juanfranek antzeko hitzak izan zituen. Alacantekoak oso pertsona «alaitzat» jo zuen. «Pena handia» sentitu duela nabarmendu zuen. «Horrelako egoeretan jabetzen gara zenbat gauza ditugun eta inoiz baino gehiago baloratzen ditugula», adierazi zuen.

Puertaren heriotzak astelehenean gorritxoek Sevillaren aurka jokatu behar zuten partida atzeratu du, eta mementoz ez dute egunik finkatu. Hala, nafarrek jokatuko duten hurrengo lehia ofiziala irailaren 14an izango da Bartzelonaren kontra.