Bihar, ACB Superkopa abian jartzen denean, hasiko da 2007/08 denboraldia. Barakaldoko Bizkaia Arena pabiloia izango da sasoiko lehenengo saskiratzeen testigu eta aurreneko titulu ofiziala zeinentzat izango den argituko du ere.

ACB Ligaren 25. urteurrenaren aurrekaria egingo dute Bizkaia Arena eta, beraz, ahalik eta ondoen atondu du CFEVENTOS etxeak, 350 langileren bitartez azken hilabeteetan jo eta ke lanean jardun ostean. Hala, 12.500 ikusle inguru egotea espero dute Barakaldoko Bizkaia Arenako harmailetan.

Horretaz gain, 200 kazetaritik gora kreditatu dira eta argiaren eta soinuaren aldetik ez da esfortzurik faltako. Izan ere, 120.000 watioko soinuaz eta 250.000 watio argiz, Superkopa NBAk eskaini ohi duen ikuskizunaren antzeko emanaldi bihurtzea da xede.

«Bizkaia Arena pabiloia halako ekitaldi bati aurre egiteko prest dago», esan zuen atzoko aurkezpen ekitaldian Fran Elorriaga, Bilbao Exhibition Centerreko gerenteak.

«Superkopak, itzelezko zabaltzea esan gura du azpiegitura eta hedabideen aldetik. Beraz, BECi ohi baino 12 espazio gehiago gaineratu dizkiogu, hala nola hornitzaileen biltegia, komunikabideentzat aretoa, hedabideen lanerako aretoa... izan daitezen. Horren planifikazio handia suposatu du».

Bestetik, 6x4 metroko hiru pantaila erraldoi ere izanen dira, hutsarteetan edo atsedenaldietan jokaldi esanguratsuenen errepikapena emateko. Baina bestelako animaziozko tailerrak ere, face painting edo «globoflexia», besteren artean.

Itsaso Barrios, Superkopako Animazio Arduradunaren arabera, «pistan oinarrituko gara batik bat, mundu guztiak partida jarraitu eta datu tekniko oro izateaz gain, jendea, pistan ez ezik, sarreratik bertatik, mugiaraziko duen animazioa ere bilatu nahi da». Ongietorriak berak «mundu magiko batean sartzea izan dadila bilatu nahi dugu» adierazi zuen Barriosek.

Etxekoen interesa

Alde horretatik, parte hartuko duten taldeak AXA FC Bartzelona, Real Madril, Tau Baskonia eta Iurbentia Bilbao Basket dira. Aurreneko finalerdian gasteiztarrak eta madrildarrak neurtuko dira eta katalanak izango dira bizkaitarren aurkari bigarren kanporaketan.

Superkopa honetatik emaitza onik ateratzeko asmorik bateren batek badu, Iurbentia Bilbao Basket izango da hori, talde antolatzailea izanik, etxean hartzen baitu ekitaldia. Gainera bere historian aurreneko finala jokatzerik izan luke, baldin eta Dusko Ivanovicen AXA FC Bartzelona gainditzen badu finalerdietan.

Sekula baino urte hobea egiteko intentzioz ekin dio denboraldiaurreari Vidorretaren taldeak. Hala, nahiz eta LEB mailako Alerta Cantabriaren aurka edo ACBra igo berri Leonen aurka hasierako neurketak galdu, azkenaldian, Weis eta Banic Eurobasketetik itzuli ostean, askoz ere joko eraginkorragoa egiten ari dira. Hala, astelehen-arteartean Menorcan jokatu zuen eta Timoner saria eskuratu du talde bilbotarrak, ViveMenorca eta BC Kiev taldeak gaindituta. Motibazioa soberan izango du eta, urduritasunak kateatzen ez badu, ez da finaletik aparte izango.

Tau Baskonia, aldiz, lasaiago dabil. Aurreko bi urteetan Superkopa irabazi du Kerejetaren taldea eta, bada, urteko helburuak oraindik urrutik daude. Bestetik, Will McDonalden afera eta kupoen gaia berpiztu delarik -McDonald espainiar batekin ezkondurik dago eta espainiar nortasuna lortu artean Europar Batasuneko jokalari gisa erabili nahi du talde gasteiztarrak, baina Espainiako Saskibaloi Federazioak horren kontra egiten du, nahiz eta badauden beste zenbait jokalari McDonalden egoera izan dutenak- mentalizazio onenetik kanpo iritsiko dira arabarrak Barakaldora. Albiste onena, berriz, Mickealek lesioa gainditu duela da.

Real Madril eta AXA FC Bartzelona zalantza hutsak dira. Madrildarrak indartsuago dabiltzala dirudi, baina Superkopa ez da ACB Liga eta azken orduan ikusiko da zer-nolako motibazioaz jokatuko duten neurketak Barakaldon.