Atzo arratsaldean, Elkartegiko aretoan, «Liburuaren Legea»ri buruzko mahai ingurua izan zen Durangoko Azokan, bertako zuzendari den Jon Irazabalek gidatua. Partaide, Euskal Editoreen Elkarteko lehendakari eta Alberdania argitaletxeko editore den Jorge Gimenez batetik, eta espainiar Parlamentuan EAJko diputatu den Aitor Esteban bestetik. Azken hori lege berria onartzeko eztabaidatan parte hartutakoa dugu.

Gaiak bere interesa izateaz gain, euskal liburugintzan eragina izan dezakeen arren, gogor samarra gertatzen da -Azokako jai giroan, are gehiago- eta entzule gutxitxoren aurrean egin zuten mahai ingurua, 16.30ean hasi, eta ordu erdi pasatxoan finitu zela.

Bata zein bestea ados agertu ziren, orokorrean, testu berriak dioenarekin, printzipio generikoak baino ez baitauzka. Hala ere, Estebanek nabarmendu zuenez, oso eremu zabala jorratzen du aldez aurretik, gurean izango dituen eraginak ezagutzeko. Orokortasun asko eta zehaztasun gutxi izan zuen mahai inguruan, irakurleari begirunea agertu, liburutegiak guztiontzat ireki, horiek hornitzeaz arduratu, irakurzaletasuna sustatu eta idazlea begirunez promozionatzeko pausuak ezartzen dituen lege berria ontzat eman zuten batak zein besteak.

Alta, Estebanen hitzetan, legearen garapena autonomi erkidegoen esku geldituko da eta praktikak ezarriko du.

Alde horretatik, gurean aurretiaz arautegia ezarri ez izanaren damua azaldu zuen Gimenezek, lege propioa izan bagenu kalte asko ekiditeko eran izango ginatekeelako, eta instituzioek ez ezik, agian sektoreak berak ere, behar den besteko kemenik eduki ez izana onartu egin zuen.

Bestalde, badirudi testu liburuen afera dela kezka gehien sortzen duena.

Gimenezek eskola liburuen salneurriaren liberalizazioa eta mailegu sistemaren inguruko hausnarketa eskatu zuen, eta dituen arriskuez ohartu.

Legeari faltan botatzen ziotenaz itaunduta, industria ikuspegia erantzun zuten biek ala biek, legeak liburugintzaren alderdi ekonomikoa alde batera uzten duelako, bien ustetan, funtsezkoa dena.