Hasiera polita eman dio Athleticek 2008ri. Urte berriko lehen norgehiagokan helburu bikoitza eskuratu zuten zuri-gorriek, San Mamesen garaipena eskuratuzuten eta, horren ondorioz, Kopako final-zortzirenak jokatzeko sailkatzea lortu zuten.

Sari bereziki atsegingarria, beste talde askok bezala, Athleticek ere txapelketa honetan izan baitezake Ligan eskuratzeko askoz zailagoak diren helburuei gerturatzeko aukera. Baina bide motzagoa izan arren, Bilbon hain gustukoa den Kopa honen ilusioak badu beste alderik, atsedenik gabeko egutegia hain zuzen; are gehiago, ekainean lehiatuko den Eurokopa dela eta, txapelketak maiatzerako amaituta egon behar direla kontuan hartuta.

Athleticek beraz, bost partida jokatuko ditu hurrengo 16 egunetan; Kopako final-laurdenetarako sailkatuz gero bederatzi partida izango lirateke 30 egunetako epean; bost Ligakoak eta lau Kopakoak, hain zuzen ere, txapelketa honen finalerdien protagonisten izenak erabakiak egongo baitira urtarrilaren 31rako.

Zuri-gorrien kasuan, gainera, ez da izango «kantitate» kontu hutsa, kalitatea ere kontuan hartu beharrekoa izango baita. Bai Ligan hurrengo asteotan izango dituen aurkariei dagokienez, baita Kopan aurki ditzakenei dagokienez ere, outsiderrak guztiz desagertu baitira joan-etorriko azken kanporaketa honetan. Gaur Madrilen egingo den zozketaren emaitzaren zain -baita final-zortzirenena ere-, Athleticek badaki hurrengo asteotan Racing, Sevilla, Osasuna, Bartzelona eta Zaragoza izango dituela aurrez aurre. Hau da, sailkapeneko lehendabiziko bi taldeak, postu horietatik oso gertu dauden beste bi eta aurkari zuzen baten aurkako derbia.

Partidaz partida

Zuri-gorriek, hala ere, ez diete buelta gehiegirik eman nahi kontu horiei, asteazkenean eman zuten urrats garrantzitsuaren ondoren. «Kopa oso garrantzitsua da», gogorarazi zuen atzo Fernando Amorebietak, bertan lehiatzearen ondorioak gustura ordain daitezkeela onartuz. «Gauza asko eskain ditzakeen txapelketa da», nabarmendu zuen. Defentsa bizkaitarraren ustez gainera, urtarril gogor honi aurre egiteko gaitasuna dauka Athleticek: «Talde ona daukagula uste dut, eta hori da garrantzitsuena, jokalari batek edo beste batek jokatu, taldeak irabazteko gaitasun berbera baitauka».

Amorebietaren iritziz, bestetik, Athleticek ez du urrunegi begiratu behar, partidaz partida joan behar du. Hurrengo aurkariek gainera, bilbotarren konzentrazio osoa merezi dute. Hasteko, Racing de Santander, «oso ondo dabilen taldea» atzelariak onartu zuenez. «Oso partida gogorra eta zaila izango da igandekoa, baina garrantzi handikoa ere bai, hiru puntu horiekin behetik irten gaitezke-eta. Ea egun ona daukagun eta puntuak ateratzen ditugun», amaitu zuen.