Azken minutuetako nekea, Rudy Fernándezen apunteria eta Ricky Rubioren maisutasuna; horra hor Tau Baskoniak DKV Joventuten aurka 78-66 galtzearen zergatia. Nahiko ongi defenditu arren, kataluniarren «R bikoitzaren» magiak zapuztu zituen arabarren usteak. Hala, ACB Ligako bigarren lekua galdu dute Spahijarenek.

Gogorrena zera da: sei minuturen faltan 62-64 aurretik zirela gasteiztarrak. 16-2ko partzialak 19-7ko azken laurden negargarria itxi zuen. Asteazkenean Partizanen aurka konpondu beharko dute gasteiztarrek azken bi neurketetako itxura txarra, eta hobe dute arnasa sakon hartzea, badaezpada ere.

Tentsio handirik gabe ekin zion Spahijaren taldeak. Nahiz eta Singleton, Mickeal eta Splitter sartu hasierako bostekoan, Fernández eta Lubos Bartoni nolabait ewusteko asko sofritu zuten gasteiztarrek. Kontraeraso bizkorrez baliatuz 15-5 aurreratu ziren etxekoak.

Hutsarteak eta aldaketek zuzendu zuen arabarren bidea. Jasaitis, Teletovic eta McDonaldek, azken honek batik bat, markagailua eta jokoa asko paretu zuten, aurreneko laurdena 20-16 -eta hori Moisok azken segundoan saskiraketa bat erdietsi zuela- utzi arte.

Erritmoa bigarren laurdenean hartu zuen Tau Baskoniak. Prigioniren eskutik hiruzpalau baloi ohostu zituzten Spahijarenek eta 28-31 aurreratzea lortu zuten Jasaitisen hiruko bati esker. Defentsan, berriz, hiru laurdenetako presioari eta 2-3 zonako defentsari esker, kataluniarren erasoa oztopatu zuten. Gainera, Partizanen aurka ez bezala, defentsako errebotea ongi zaindu zuten baskonistek. Vidalen hiruko batek 35-39 jarri zuen markagailua.

«Penyak» ez zuen amore ematen. Ricky Rubiok erantzukizuna hartu zuen erasoan eta atsedenaldira markagailua 42-41 zela iritsi zen.

Aurreneko erdiko eraso festa bertan behera geratu zen atsedenaldiaren ondoren. Defentsek asko sakatu zuten, falta egiten zituzten asko begiratu gabe gainera. Hala, jaurtiketa libreen bidez hasi ziren loditzen talde bien markagailuak, izan ere, jokoan oso-oso nekez lor baizitekeen sakiraketarik.

Lubakien estrategia honek ez zion kalterik egin talde arabarrari. Hala, hirugarren laurdena 59-59 amaitu ondoren, azken laurdenean aurrea hartu zuten. Sei minuturen faltan 62-64 zegoen markagailua.

Arnasarik gabe

Etxekoen artean Rudy Fernándezek ardura hartu zuen berriro, nahiz eta arabarren defentsak lan handia eginarazten zion eskolta gazteari. Bere ahaleginak Palau Olimpic-eko 12.557 zaleak piztu zituen eta presio latza egin zuten neurketa irabazteko.

Tau Baskoniaren aldetik, berriz, arnasarik gabe geratu ziren azken minutu horietan. «R bikoitza» buru hartuta, defentsa ere topera gogortu zuten. Horren ondorioz Rakocevici adierazi falta teknikoa adierazi zitzaion eta 7-0eko partziala ezarri zuen Badalonakoek.

Hurrengo erasoetan baskonistek burua beroegi ukan zuten, orotara 28 baloi galduta; larregi nahiz eta DKV Joventut berez den «lapurretarako prestaturiko taldea». Partzial hori 15-0eraino luzatu zen, partida erabakiz.