Kimuak programaren hamargarren edizioko zortzi film laburrak irailean aurkeztu zituzten eta, geroztik, mundu zabaleko 500 zinemalditan hautatu dituzte. Sarituak ere izan dira; izan ere, dagoeneko 82 dira irabazitako sariak, horietatik 20 nazioarte mailakoak. «Balantzea -behin-behinekoa, filmak oraindik beren bidea egiten ari baitira-, oso positiboa da, are gehiago, bikaina», adierazi zuen atzo prentsaurrekoan Txema Muñoz programaren koordinatzaileak.

Irabazitako sarien artean, nabarmentzekoak dira Izibene Oñederraren «Hezurbeltzak» filmak Sttutgart-en, Brooklyn-en eta Zagreb-en lortutakoak. Koldo Almandozen «Columba Palumbus», berriz, Kolonbian saritu dute; Victor Iriarteren «Decir adiós», Uruguain; Haritz Zubillagaren «Las horas muertas» eta Ugo Sanzen «No es una buena idea», Italian; eta Jorge Doradoren, Luiso Berdejoren eta Borja Cobeagaren «Limoncello», Alemanian. Dena dela, zinemaldiek gehien hautatu dituzten filmak Telmo Esnalen «Taxi?» eta Daniel Sánchezen «Traumatología» izan dira. Bi horiek Ameriketako Estatu Batuetan, Estatu frantsesean eta Italian saritu dituzte.

Muñozen esanetan, emaitzak bereziki aipagarriak dira, batez ere Kimuak-ek aurten egin duen selekzioa «oso ausarta» izan dela kontuan izanik. «Arriskua zuten filmen aldeko apustua izan da; hautatutako filmak kalitate handikoak dira, baina ez dira konbentzionalak, eta zinemaldietan arrakasta izan ohi duten filmen parametroetatik ateratzen dira», argitu zuen.

Erreferentziazko ekimena

Aurtengo emaitzak programak azken urteotan lortu duen erreferentzialtasunaren adierazle dira. «Hainbat zinemaldik -aipatu zuen Muñozek adibide moduan- ez dute programazioa ixten Kimuak-eko euskal film labur berriak ikusi arte. Une honetan bertan, gure filmak, AEBetan, Alemanian, Norvegian, Australian, Italian, Korean, Marokon eta beste hainbat herrialdetan ikus daitezke».

Lakuako Kultura Sailak film laburrak sustatzeko eratutako programa da Kimuak eta, Gurutz Larrañaga sailburuordeak gogoratu zuenez, Euskal Filmategiak kudeatzen du, «bikain kudeatu ere», gehitu zuen.

Mikel Arregik, Filmategiko gerenteak, berriz, Kimuak 2008 edizioan parte hartu nahi duten zinemagileek izena emateko epea uztailaren 24an amaituko dela gogorarazi zuen. Argibide gehiago: Euskadiko Filmategia, 943-115511 edota kimuak@filmotecavasca.com.