«Saiakela» omen da Fito Rodriguezek Utriusque Vasconiae argitaletxearekin plazaratu berri duen lana, hau da, saiakeraren eta nobelaren arteko hibridoa. «Jerusalem, Xalimen hiria» «elkarrizketaren aldarrikapena da neurri handi batean» eta, era berean, «bizikidetza eta bizitzari buruzko diskurtsoa». Rodriguezen liburua hamaika atetan egituratzen da: «Jerusalemgo harresiak dituen hamaika ateek banatzen dituzte atalak, eta oso hizkera naturala eta sinplea erabiltzen dut, eta bide horretan sakontzen saiatzen ari naiz».

Bizikidetza hizketagai

Filosofia eskolan, atzeko lerroetan hizketan ari dira Joxe, Maria eta Josu, eta irakasleak ikasgelatik kanpora bidaliko ditu. Kanpoan daudela, Artizarne izeneko andereñoa hurbilduko zaie eta bizikidetzari eta Jerusalemi buruz hizketan hasiko da beraiekin. «Elkarrizketa hori hamaika ataletan banatuta dago; eta, hamaika, zenbaki zehatz gisa erabiltzen da, baina baita kopuru mugagabe gisa ere. Alde batetik, arrazionala dena azaltzen da eta, bestetik, irrazionala dena», azaldu zuen Rodriguezek Jokin Apalategi argitaratzailea eta Joxemiel Bidador -hitzaurrearen egilea- albo banatan zituela.

Poeta palestinar baten olerkia gogoan hartuta -«Zure isiltasunak min egiten dit, biziak bezainbeste, denboraren jarioak beste»-, israeldarren eta palestinarren arteko borroka hartzen du erdigunetzat eta, hortik abiatuta, munduan jazotzen diren gatazka guztietara heltzen da. «Hitz egin behar da, idatzi behar da, hor gertatzen denari buruz, han gertatzen ari dena hemen ere gertatzen ari delako. Ez da alegoria liburua, oso lotura zuzena duelako munduan gertatzen ari den guztiarekin eta, ez bakarrik orain gertatzen ari denarekin, historian zehar gertatu denarekin ere bai», esan zuen. Rodriguezek Utriusque Vasconiarekin argitaratu zuen orain lau urte «Faustoren itzala» liburua, «saiakela»ren aitzindari izan zena, eta datorren otsailean lan horren erdarazko itzulpena aurkeztuko du Habanako liburu azokan.