Euskal Idazleen Elkarteak (EIE) Finlandiako literaturari «Hegats» berezia eskaini dio, suomieratik euskarara zuzenean itzulita hainbat testu biltzen dituena. Fito Rodriguezek eta Tytti Thusbergek, EIEko eta Suomitar Euskal Herria-Finlandia Kultur Elkarteko lehendakariek, hurrenez-hurren, azaleratu zituzten ale berezi horren alde erakargarrienak. Rodriguezen arabera, «Finlandiako kasua eredugarria da euskaldunontzat, bai suomieraren normalizazioari dagokionez, baita literaturak suomierazko kultura zabaltzeko eta herri izaera eraikitzeko jokatu duen rolari dagokionez ere. Hori islatuta geratu da «Hegats»en zenbaki berezian», azaldu zuen. Tytti Thusberg-ek, bere aldetik, «harro» dagoela aitortu zuen eta, alea «oso konpletoa» dela gaineratu: «Hau bezalako zerbait da euskaldunei nire herriaren berri emateko beti egin nahi izan dudana», esan zuen.

Azken urteotako ohiturari jarraituz, Durangoko Azokaren babesean, atzerriko literatura bat hobeto ezagutzeko jardunaldiak antolatu zituzten EIEk eta Gerediagak. Langintza horretan laguntzaile aparta izan dute Suomitar Euskal Herria-Finlandia Kultur Elkartea, aurten aukeratutako literatura Finlandiako edo, hobe esanda, suomierazkoa izan baita. «Hegats» monografiko berriak Durangoko jardunaldien isla eta osagarri izan nahi du.