Astebeteko festa eskaintzen dute Piratek Donostiako Aste Nagusian, eta urtero legez, ekitaldi berriak txertatzen dituzte programan. Aurtengoa, atzo Urgullen egin zuten Erromeria Eguna izan zen.

Zuzenean igo beharrean, albokariak eta trikitilariak bildu ziren Santa Maria eliza berrituaren magalean, giroa sortu eta jendea animatzeko.

Arin-arinen erritmoan Parte Zaharrean barrena ibili ziren, eta ordu biak inguruan ekin zioten, aldapan gora, Urgullera igotzeari.

Damen Baterian denetarik egon zen, adin guztietako lagunen nahiak asetzeko, hainbat ekitaldi zeuden antolatuta. «Hasteko, kontzertu klasiko txiki bat izango da; berezia izan zitekeela iruditu zitzaigun», adierazi zuten antolatzaileek.

Hasierako alboka eta trikitiak alde batera utzita, beraz, aulkietan eseri ziren Urgullen paseoan zebiltzanak eta Erromerian parte hartzera joandakoak.

Hodeien mehatxua

Lainoek mesfidati begiratzen zuten arren, azkenean egitarauari eustea erabaki zuten. Eguraldi goibela zela-eta, nahi baino jende gutxiago bertaratu izana lastima izan zen antolatzaileentzat.

«Erromeria egun eguzkitsu batean egitea politagoa litzateke, inguru honetaz gehiago gozatzen delako. Dena den, euririk egiten ez baldin badu, eskerrak eman beharko ditugu», aipatu zuten.

Jatekoarekin gozatzeko parada ere izan zen atzokoan.

Baserritarrez jantzita, emakume talde bat jo eta su ari zen taloak egiten, eta bertara iritsi ostean, eskertzekoa zen hamai- ketakoa. Bazkaria bultzatzeko berriz, nahi adina garagardo eta freskagarri edateko aukera ze- goen itsasoari begira muntatu zuten barran.

Bazkalostean haurrak saltoka ibili ziren puzgarrietan, eta gainerakoak, trikitixa doinuekin dantza eta dantza. «Aurreneko aldia izanik, eta eguraldi kaskarra kontuan hartuta, pozik gaude emaitzarekin».

Gaur, Abordatzean, askorentzat festetako ekitaldi nagusia, 250 baltsatan aterako dira portutik Piratak hiria abordatzeko prest.