Neurririk gabeko kanpaina, ez buru ez hanka ez duen proposamenaren ondoren. Alan Fisher kazetariak Al Jazeera telebista katearen webgunean idatzi duenez, «zein neurritakoa da minareteen arazoa? Suitza osoan lau minarete besterik ez dago-eta». Minareteen kontua aitzakia besterik ez da, gaurko erreferendumean dorre horiek ez debekatzearen aldeko botoa eskatzen dutenen iritziz. Giroa nahastu eta eskuinik populistenak beti hain gustuko izan duen xenofobia areagotzea litzateke atzean dagoen asmoa.

Ekmeleddin Ihsanoglu Konferentzia Islamikoaren Erakundeko idazkari nagusiak oso adierazpen diplomatikoak egin ditu: «Ziur naiz Suitzako herriak erabakirik onena hartuko duela». Bere ustez, hori bai, minareteak debekatuko balira, «atzerrian ez lukete ezer ulertuko eta Suitzak kanpoan duen irudia erabat kaltetuta geratuko litzateke».

Minareteak debekatzearen aldekoek oso propaganda iraingarria egin dute. Iragarkietan emakume baten irudia ageri da, burua erabat estalita duena (begiak ikusten zaizkio), eta atzean, misil tankerako zazpi minarete, Suitzako bandera zulatu dutela. Irudiak «gorrotoa areagotzen du», CFR Arrazakeriaren aurkako Batzorde Federalaren ustez. «Iragarki gaiztoak» direla-eta, NBE Nazio Batuen Erakundeko Giza Eskubideen Batzordeak bere kezka adierazi du.

Iragarki horiek beste eztabaida bat eragin dute herrialdean: hiri batzuetan debekatu egin dituzte, iraingarriak direlakoan, eta beste batzuetan ez, adierazpen askatasunaren izenean.

Gobernuak eta alderdi politiko nagusiek minareteak debekatzearen aurkako botoa eskatu dute, ekimenak giza eskubideak bortxatzen dituelako eta «erlijioen arteko bakea arriskuan ipintzen duelako», Eveline Widmer Schlumpf Justizia ministroaren arabera. Suitzako Erlijioen Kontseiluak (kristauak, musulmanak eta juduak elkartzen ditu) ere gauza bera esan du.