Itoiz talde maitatua eta gogoratua da oso gurean, eta egun herrikoi bihurtuak dira beraiek sortutako kantu batzuk. Alta, udan guztiz harritu gintuen Juan Carlos Perez mutrikuarrak, kantu ahaztezin horietako batzuk molde sinfonikoan emanda. Lanak «Itoiz suite» izena hartu zuen, eta Bilboko jaietan eman zuen zuzeneko emaitza, Bilboko Orkestra Sinfonikoak (BOS) jo musikan.

Perezek proiektuaren bukaeratzat jo zuen «Itoiz suite» argitaratu izana, eta gogorarazi zigun 2008ko urtarrilean hasita, obra idazten buru-belarri sartuta urte eta erdi eman zuela, «BOSen proposamena jaso ostean». Eta pozik agertu zen, «horrelako orkestra oso batekin» lan egiteko aukera izanda. Eta emaitzarekin gustura agertu zen, artista eta jagole askoren ekimena izan delako. Lanaren argitalpena gainera, oso txukuna da -formatu normal zein luxuzkoan- eta barruan Perezek idatzitako azalpenak dakartzan liburuxka jasotzen du.

Bestalde, BOSeko zuzendari nagusi Ibon Aranbarrik aberasgarritzat jo zuen lana, eta «espero dezagun azkena ez izatea» gaineratu. Bere aldetik, Brian´s Recordseko arduradun Jose Angel Serrano pozik agertu zen, «Itoizek gurean duen esanahiagatik, harro gaude lana ekoiztu izanaz, gure diskoetxearen sorreran baitago egitasmoa».

Soinua eta irudia

Lanak bi atal ditu. Batetik, soinua, Mikel F. Krutzagaren gidaritzapean, BOSek Sarrikon, Musika Kontserbatorioko entzunaretoan, iragan irailean grabatua. Eta bestetik, irudiak, EiTBk Bilboko jaietan egindako estreinaldian zuzenean grabatuta. DVDak, orkestra jotzen agertzeaz batera, Jesus Mari Lazkano artista plastikoak zuzeneko horretarako sortu irudiak agertzen ditu. Lazkanok zubigiletzat jo zituen artistak, eta bakoitzak bere esparruan, musika eta irudia uztartu eta «herri paisaia sentimentala sortzeko ahalegina» egin izana aipatu zuen.