Gaur arratsaldekoa partida arraroa izango dela dirudi. Alde batetik, Oleson LEB Ligan ezagun egin zen hirira itzuliko da -LEB Ligan jarraitzen duen Rosalian jokatu zuen- eta, bada, Alaskako eskolta biziki motibaturik egongo dela dirudi. Bestetik, Splitter eta Barac gabe, batez ere brasildarra gabe, Baskoniak ongi jokatzen badakiela erakutsi nahiko du Zagrebeko eskapadaren ostean. Aurkaria, aurreneko itzuli bikaina egin ostean, gainbeheran dago eta horri etekina ateratzen saiatuko da.

Alabaina, galiziarrek ere badute motibaziorik. Izan ere, Marc Jacksonek Fontes Do Sar pabilioian jokatuko duen azken neurketa izango baitu gaur eguerdikoa. Asteon, estatubatuarrak saskibaloia uzteko asmoa duela aitortu du, «fisikoki zein mentalki akituta» dagoelako. Hala, taldea gauetik goizera bertan behera ez uztearren, Kopako etena iritsi arte jarraitzea onartu du; hau da, hurrengo asteburura arte.

Jacksonez gain, Stanic, Terry eta Bulfoni dira Curro Seguraren taldearen bizkarrezurra. Sanchez, Vasileiadis eta Dedovicek osatzen dute errotazioa.