Kale animazioa, 1.500 lagunentzako herri bazkaria, sabel dantza eta flamenkoa ikasteko aukera, independentziaren aldeko jinkana, nazioarteko hamaika esperientzia, momotxorroak nahiz hankapaluak faltan izango ez dituen kalejira eta Berri Txarrak, Ojos de Brujo, Asian Dub Foundation edo Esne Beltza musika taldeen emanaldiak ikusteko aukera. Hori guztia eta askoz gehiago topatuko dute etzi GaztEHerriarekin Durangon bat egingo duten milaka gazteek. GaztEHerria askoz harantzago doa, ordea, eta GARAk hor arakatu nahi izan du, bere bi bozeramaileen laguntzarekin.

Nola definituko zenuke GaztEHerria?

Nora Aurrekoetxea: Euskal gazte ezkertiar eta independentistak barnebiltzen dituen bilgunea da. Egunerokotasunean independentziaren alde lanean diharduten norbanako zein eragileak batzen dituena.

Fran Urias: Dinamika bat da; ez da ekimen soil bat, eta bi helburu ezarri dizkiogu: batetik, bilgune hori irudikatzea eta independentzia gazteen alternatiba dela adieraztea; eta bestetik, Euskal Herriak bizi duen fase politiko berri honetan gazteok gure harria jartzea.

Nola sortu zen GaztEHerriaren ideia?

N. A: Esparru ugaritan gabiltzan gazteak, bai kirolean, musikan edo kultur mailan dabiltzanak, edo era antolatu batean ikasle edota feminista gisa... guztiok helburu komun bat genuela ohartu eta indar metaketa egiteko aukera ikusi genuen. Horrela sortu genuen GaztEHerria, batzen gaituen independentzia nahiari bide emateko.

Eta zein da gazteok fase politikoari egin nahi diozuen ekarpena?

F.U.: Guk erakutsi nahi dugu herri honen alternatiba bakarra independentzia dela, eta zehazki, gazteriari erakutsi nahi diogu independentzia dela euren arazoen alternatiba, bai independentzia politikoa, baina hain garrantzitsua den independentzia pertsonala ere bai.

Zer-nolako sukalde lana egin duzue GaztEHerria osatzeko eta atxikimenduak batzeko ?

F.U: Adierazpen bat osatzea izan zen lehen eginbeharra, eta hori erabili dugu lanerako oinarri, eta horrexegatik, ez da izan horren zaila babesak eskuratzea, adierazpenarekin bat egiten duen orok lekua du-eta GaztEHerrian. Kanpotik imajina daitekeena baina errazagoa izan da, eta oinarriekin ados daudenak GaztEHerriak-en ateak oraindik ere zabalik ditu.

Gazte Abertzaleak, Alternatiba, Ikasle Abertzaleak denek osatzen dute GaztEHerria. Iratzarriren atea jo al duzue?

F.U: Jo bai, baina ez dute gurekin lan egiteko borondatea agertu.

Joan den azaroan hamarnaka gazte atxilotu eta espetxeratu zituzten, baina gazteria oraindik ere lanerako gogoz dago?

F.U: Bai. GaztEHerriarekin gazte independentisten indar erakustaldia egin nahi dugu, egurra ematen diguten arren, hor gaudela frogatu nahi dugu.

Egun osoko jaialdia antolatu duzue ostiralerako Durangon. Zerbaiten hasiera al da hori?

N. A: Epe luzerako dinamika bat izango da GaztEHerria. Aurrera begira lanean jarraituko dugu, nahiz eta oraindik ez dugun lan hori zehaztu. Ostiralekoa asmo honen lehen harria izango da, seguru.

Egunari zein helburu jartzen diozue?

N.A: Irudi bat utzi nahi dugu Durangon; independentziaren aldeko gazte uholde handi bat irudikatu nahi dugu eta euskal gazteria independentziaren aldekoa dela argi utzi nahi dugu.

F.U: Ekimen ugari egongo dira. Goizean hitzaldi eta tailerrak izango ditugu. Kamaradakek nazioarteko ordezkaritza zabal bat ekarriko du, eta beste herrietako esperientziak gurekin partekatuko dituzte. Bestetik, «Gazteok eta independentzia» goiburua duen mahai-inguruarekin, gazteen arazoak aztertu eta horien alternatiba independentzia dela nabarmenduko dugu. Hala ere, jaialdi bat den heinen egun osoan zehar ondo pasatzea nahi dugu, elkar ezagutzea eta giro polit bat sortzea, hurrengo egunean denok berriz gogoz lanean hasteko.

Zenbat lagun behar dira jaialdi hau prestatu eta egin ahal izateko?

F.U.: Ostiralean bertan bostehun eta mila lagun artean ibiliko dira boluntario lanean, mahaiak prestatzen, bazkaria banatzen, txosnan txandak egiten... asteazken eta ostegunean ere muntaketa lanetan beste berrehun lagun arituko dira eta ondoren dator desmuntatzea, beraz esku guztiak izango dira ongi etorriak Durangon.

Hendaia eta Irun arteko Aberri Egunerako deia egiteaz gainera, «poteo olinpiada» antolatu duzue, Moskuko plazan, 16.00etan. Zergatik da garrantzitsua gazteak bertaratzea?

N.A: Gazteak bertan egon behar gara, beti esaten da gazteria dela etorkizuna, eta ikusita zein egoeran gauden, ba are garrantzitsuagoa da guk bertan parte hartzea.

F.U.: GaztEHerriaren helburua da fase politiko honi gazte ekarpena egitea, eta horrenbestez, ezinbestekoa da inflexio puntua izango Aberri Egun bateratuan egotea.