Aste honetan egiten ari dira Euskadiko Eskola Kontseiluaren hogeigarren urteurrenaren ospakizun ekitaldiak. Euskal Autonomia Erkidegoko instituzio honek ospakizun honetarako aukeratu duen leloa «Hezkuntzak elkartzen gaitu» da. Egia da, bai. Hezkuntzak elkartzen gaitu. Horregatik parte hartzen dugu ikasle eta abertzaleok bertan, eta baita hezkuntza komunitatea batzen eta elkar elikatzen duten foro eta gune ezberdinetan.

Horregatik, zorionak eman nahi dizkiogu, instituzio honetan erabateko borondate onarekin euskal irakaskuntzaren alde jarduten duten hezitzaile, langile, guraso eta ikasleei. Zalantzatan jartzen dugu, ordea, ospakizunerako garaia dugun hau.

Euskal Herriko Hezkuntza departamentu ezberdinetatik euskal hezkuntzak urteetan jasan duen erasorik handienetakoa jasaten ari gara azkenaldian. Adibide gisa, aipagarria da Isabel Celaa EAEko Hezkuntza sailburuak euskal hezkuntzaren kontra darabilen estrategia autoritario eta espainolista. Hortaz, euskal ikasleok ez dugu ospatzeko ezer. Bai, ordea, borrokatzeko asko.

Azken ikasturteetan hainbat izan dira eztabaida sortu eta txoko ezberdinak xaxatu dituzten gaiak. Azkenengoa, eta hezkuntza komunitatean zalaparta ugari sortu duena, eskolaldi ezberdinetarako proposatu diren curriculum dekretu berriak dira. Gai honen inguruan ikasleok kezka eta salaketa azaldu dugu behin eta berriz eremu ezberdinetan. Baita Euskadiko Eskola Kontseiluan bertan ere. 

Baina gaur egungo Eskola Kontseilua ez da gai izan euskara eta Euskal Herriaren aurkako erasoa baldintzatzeko. Instituzio honek igortzen dituen irizpenak ez-lotesleak dira eta horrek horrela izaten jarraitzen duen bitartean, Hezkuntza Sailaren aurpegi-garbiketarako gune soil izaten jarraituko du, tamalez. 

Hori da azken Batzar Orokorreko ebazpenarekin gertatu dena. Bertan, curriculum berrietan euskarak hizkuntza nagusia izan behar duela aho batez bertako ordezkarien bozaz onartu bazen ere, Hezkuntza Sailaren hizkuntz ereduen inguruko proposamen berriak ikasleak euskalduntzeko inolako borondaterik ez duela argia da. Finean, kontseiluaren beraren erabakiari muzin egin dio Celaak zuzendutako Sailak. 

Egoera hori izanik, ospatzeko gabe, aldarrikatzeko garaia dela deritzogu. Izan ere, Euskadiko Eskola Kontseilua ikasleok aldarrikatzen dugun eskola kontseilutik urrun dago oraindik. Euskal ikasleok, euskal hezkuntza komunitate osoa bilduko duen eskola kontseilua nahi dugu. Hezkuntza sistema nazionalaren alde lan egingo duen eskola kontseilua nahi dugu. Euskal Herriko zazpi lurraldeetako ordezkariak eta errealitateak bilduko dituen eskola kontseilua, alegia. Euskal herritar guztiei irekia izango dena. Curriculum arrotzen ordez, euskal curriculumaren alde lan egingo duena. Euskal Herria eta euskara defendatuko dituena eta eskoletan lehentasunezko hizkuntza izan dadin borroka egingo duena. Ikasleon eskubideak errespetatuko dituena. Demokratikoa. Aurrerakoia. Finean, Euskal Herriko Eskola Kontseilu nazionala nahi dugu ikasle eta abertzaleok. 

Beraz, ondorengo urteurrenetan euskal ikasleok inolako eragozpenik gabe instituzio hau zoriondu dezagun, bilaka dezagun denon artean Euskadiko Eskola Kontseilua Euskal Herriko Eskola Kontseilu.