Preso Politikoen Nazioarteko Egunaren karietara, milaka lagun mobilizatu ziren euskal preso eta errefuxiatu politikoen eskubideen alde. Ostiralero bezala, Euskal Herriko hamaika txokotan izan ziren kontzentrazioak.

Horrez gain, iragan asteartean eman zioten hasiera Gasteizko Amnistia Asteari, 80 bat parte hartzaile izan zituen futbito txapelketarekin. Hurrengo egunean, preso dauden Zumai Olalde eta Iker Araguasi idazteko mahaitxo bat prestatu zuten eta horren ostean herri bazkaria egin zuten.

Espetxera martxa

Bestalde, Guardia Zibilen oztopoen gainetik, euskal preso politikoekiko elkartasuna ostegunean egindako martxari esker espetxera iritsi zela adierazi zuten. Gauean, Euskal Herrira bueltatu zirenean, berriz, Gasteizko gaztetxea «txiki geratu zen» Elkartasun Jaialdian.

Bilboko eta Gasteizko campusetako hainbat gazte Madrilera abiatu ziren herenegun. Estremerako espetxea izan zen lehenengo geltokia, eta gero Valdemorora eta Soto de Realera joateko asmoa zuten. Hamaikak aldera iritsi ziren eta ikurrinak, megafonoa eta txalaparta hartuta kartzelako inguruetara hurbildu ziren. Ordubetez, txalapartaren doinuak lagunduta, oihu eta oihu jardun zutela jakinarazi dute.

Autobusera itzuli zirenean hamabost bat guardia zibil zituzten zain. Hasiera batean, autobusera sartzeko inolako eragozpenik jarri ez bazieten ere, Polizia berehala igo zen autobusera identifikazio agiriak erakusteko agintzera.

«Irratirako elkarrizketa bat egiten ari zen lagun bati telefono deia mozteko» agindu zioten poliziek, eta debeku horren atzetik, telefono guztiak kenduko zizkietela egin zieten mehatxu, martxan parte hartu zuten solidarioen esanetan. Segidan, banan-banan, autobusetik jaitsarazi, identifikarazi, errepidearen beste aldera bidali eta lurrean eserarazi zituzten gazteak. «Martxa nork antolatua zen, Segikoak edota talde feministaren batekoak ote ginen behin eta berriro galdetu ziguten, ea Korrikan parte hartzen genuen eta abar», salatu zuten. Poliziek nesketako bati horrelako ekimenen batean beste inoiz izan al zen galdetu zioten eta neskak ezetz erantzun zien. «Datuak pasata beste ekimen batean identifikatua izan zela jakin zutenean honakoa esan zuen guardia zibiletako batek: `me ha mentido, la hija de puta no es virgen'». Argazki kameretako txartelak kendu eta bertako argazki guztiak ezabatu zizkieten.

Handik bi ordura, autobusean sartzen utzi zieten, baina Guardia Zibila berriro ere autobusera igo, arduradun baten izena emateko eskatu eta «terrorismoa goratzea» leporatuko zietela mehatxu egin zieten. Gazteek, berriz, arduradunik ez zegoela eta denak solidarioak zirela erantzun zieten.

Horren ostean, Guardia Zibilak pare bat pankarta, megafonoa eta hainbat banderola kendu zizkieten. Gasteizerako bidean zirela, lau lagun EHNA falta zitzaiela ere konturatu ziren. Hortaz, iritsi zirenean, Ertzaintzarenera jotzea erabaki zuten hori salatzeko, baina ertzainek EHNA ez dela dokumentu ofiziala esanda salaketarik ezin zutela jarri erantzun zieten.

Gasteizera iritsitakoan, Gasteizko Gaztetxeko jaialdia hasi zuten Lizarrako Zaplasteko taldearekin. Nafarroako taldeak bukatu zuenean, ekitaldi politikoa egin zuten eta unibertsitateko kide zituzten eroritako militante Aranba eta Trujori ere omenaldi xumea egin zieten bertso eta lore eskaintza batekin. Jarraian, Ze Esatek! taldeko kideek ordu txikietara arte luzatu zen jaiari ekin zioten.