Nazioarteko Sortzaile Berrien Antzerkialdia dugu ACT, aurten zazpigarrenez jokatuko dena, datorren asteartean, ekainaren 1ean hasita. Bizkaiko Antzerki Ikastegiak, BAIk, «abangoardia sortzaileen lana» sustatu beharra dagoela iritzita antolatzen duen jaialdiak «haize berriak dakartza gurera», atzoko aurkezpenean babesleek esan zutenez.

«Aurtengo egitaraua inoizko nazioartekoena da», nabarmendu zuen jaialdiko zuzendari Fer Montoyak. Oholtzara 40 minutuz azpiko 50 lan inguru eramango dira -hamabost herrialdetako artistek emanak-, eta horietarik 17 lan labur izango dira lehiaketan. Aparte, antzerki ikastegietako sei lan, 14 lan filmiko eta beste ezagutzeko parada ere izango da. Dantza, antzerki eta zinema ikastaro zein hitzaldi irekik osatuko dute jaialdia.

Atalak labur aipatzearren, lehiaketak Laburract ataleko pieza laburrak jasoko ditu, Dantzinek arte eszenikoekin harremana duten bideo edo zinema lanen lehiaketa eta erakusketa izango da, eta ReACTek bigarren aukera bat emango die zenbait lani, astebete geroago eta Basaurin.

Topagune eta erakusleiho

«Xede garrantzitsuena antzerkiaren belaunaldi berriei ateak ireki eta etorkizuneko antzerkiari bidea ematea du jaialdiak». Eta lehiaketa baino gehiago topagune, erakusleiho eta trukerako esparru izan nahi duenez, ACTmosfera arratsak ere jasoko ditu Kafe Antzokiko bazkalosteak, ekimenean parte hartzen duten artistek elkarren berri izan dezaten, antolatzaile taldeko Joseba Lazkanoren esanetan. «Jaialdia finkatu eta zabaldu egin da, baita Europan eredu bihurtu ere» -egun sei jaialdiko sarea sortua dute-.

Lehiaketako epaimahaia nazioartekoa da oso. Eta sariei dagokienez, 1.500 euroko dirusaria izango da Dantzinen, eta 3.000 euroko dirusaria Laburract-en.