Aizkora izango da datozen egunetako protagonista nagusia, izan ere, kirol hau nagusi baita Gasteizko jaietan. Batetik, torneo irekia jokatzen ari dira egunotan, egungo aizkolaririk onenak arabarrekin uztartuta, eta bihar herrialdeko txapelketa erabakiko da. Jaialdi guztiak 12.30ean dute hitzordua Foruen plazan.

Torneoa herenegun hasi zen eta atzo jokatu zen bigarren finalerdia. Finala bihar jokatuko dute, eta bertan Atutxa eta Zubiaga Nazabalen eta Jauregiren aurka neurtuko dira.

Herenegun jokatu zuten lehen finalerdia, eta bertan Atutxak eta Zubiagak mendean hartu zituzten Larretxea eta Llanos. Bost proba egin behar izan zituzten abiadura eta iraupen probak uztartuz, eta 20 minutu eta 58 segundotan burutu zituzten lanak Atutxak eta Zubiagak; 21 minutu eta 23 segundotan, berriz, Larretxeak eta Llanosek. Aipaturiko bost probetatik hirutan gailendu ziren amaieran garaipena eraman zuten aizkolariak, eta baten Larretxea eta Llanos. Berdinketa bat ere izan zen, izan ere, bi bikoek 38 kolpetan erdibitu baitzuten 45 ontzako enborra.

Atzokoan ere lan bera egin behar izan zuten aizkolariek, eta txapela lortzeko faboritoek, Nazabalek eta Jauregik, alegia, ez zuten hutsik egin. Garaipen erosoa lortu zuten, jokatutako bost probetan garaile atera baitziren Lopezen eta Rodriguez I.aren aurka. Lan guztiak burutzeko, 17 minutu eta 21 segundo behar izan zituzten Etxarriko eta Ilarduiako aizkolariek, eta Lezaungoak eta Segoviakoak, berriz, 18 minutu eta 46 segundotan amaitu zituzten lanak.

Finala gaur eguerdian jokatuko dute, eta Nazabal eta Jauregi dira faboritoak. Etxarriko txapelduna tartean bada, beti da faborito, une honetan besteen gainetik baitago. Dena dela, Zubiaga eta Atutxa ahaleginduko dira faboritoak estu hartzen.

Arabako finala

Bihar herrialdeko finala jokatuko da. Zazpi aizkolarik eman zuten izena, eta kanporaketa jokatu ostean, honako hauek arituko dira nor baino nor bihar eguerdian: Jauregi, Zubiaga, Rodriguez I.a eta Llanos. Aizkolari bakoitzak 45 ontzako bi enbor, beste bi kana-erdiko eta bi 60 ontzako erdibitu beharko ditu. Garaipena lortzeko faborito nagusia Zubiaga da. Bera da azkeneko urte hauetako txapelduna, eta gainerakoei aldea kentzen die. Bera da, gainera, Euskal Herrikoan Lehen Mailan ari den bakarra. Llanos eta Jauregi Hirugarren Mailan ari dira, eta Rodriguez, berriz, segoviarra denez, ez da Euskal Herrikoan aritzen. Dena dela, lehiaketa honetako ustezko bi onenak, Jauregi eta Zubiaga, gaur ere arituko dira torneoko finalean, eta agian lan horren ondorioak izan ditzakete, baina zail izango dute, hala ere, Zubiagari txapela kentzea.

Aizkolariak ez dira Gasteizen bakarrik izango, Urrezko Aizkorako Txapeldunen Ligako saioa jokatuko baita etzi eguerdian, 12.30etik aurrera Orozkon. Horretan Nazabal eta Arrospide lehiatuko dira, eta Buruz Buruko Urrezko Aizkorako finalaren errebantxa izango da. Orduan Nazabalek lortu zuen garaipena. Gaurkorako ere bera izango da faboritoa, Etxarrikoa baita lehiaketa hau eramateko ere hautagai nagusia.

Orain arteko saioen ostean, sailkapeneko lehendabiziko postuan berdinduta daude Arrospide, Nazabal eta Larretxea. Bakoitzak 2 puntu ditu, eta oreka hori gaurko saioaren ostean amaitu egingo da, izan ere, Nazabalek edo Arrospidek, garaipena lortzen duen aizkolariak, eskuratuko baitu sailkapeneko lehen postua, nahiz eta Larretxea baino saio gehiago izango dituen jokatuak.

Gasteizen, kirol arloan aizkorak dauka protagonismo nagusia, baina ingude- eta lasto-altxatzeko herrialdeko finalak ere jokatu dira. Ingude-altxatzean, Lauzirikak eskuratu zuen garaipena, 79 jasoaldi emanda. Emakumezkoetan, berriz, Ferranek jantzi zuen txapela. Gaurko jaialdirako, berriz, herrialdeko lasto-altxatzeko finala dago iragarrita. Bertan, Lauzirika, Lopez eta Velez de Mendizabal neurtuko dira. Hiru bikoen artean oreka handia izaten da, eta gaur eguerdian ere horrelaxe izango da seguruenik.