39 urteko gizonezko bat atxilotu zuten atzo Getarian, minutu batzuk lehenago lapurtu zuen motorrarekin istripua izan ostean.

Lakuako Barne Sailak adierazi zuenez, asteartean, 18:30ean, pertsona batek Getariako Kale Nagusian Yamaha markako motozikleta bat ostu ziotela salatuz dei egin zuen Ertzaintzara. Gainera, lapurrak N-634 errepidean Zarautz aldera ihes egin zuela adierazi zuen motorraren jabeak.

Minutu batzuk geroago, Getaria eta Zarautz artean N-634 errepidean izandako istripu baten berri izan zuen Ertzaintzak. Gidariak zauriak zituen, eta Donostiako Ospitalera eraman zuten. Istripua izan zuen motorra lapurtutako hura zela egiaztatu ondoren, gidaria atxilotu zuen Ertzaintzak.