Gasteizko Legebiltzarrak Ikasbidea ikastolan garraio zerbitzuak izan dituen murrizketen nondik norakoak azter ditzan eskatu dio Lakuako Hezkuntza Sailari. Aurten ikastolan hasi berri diren eta inguruko herrietan bizi diren 300 bat ikaslek ez dute aukerarik eguerdiko autobusa hartu eta etxean bazkaltzeko. Hiriburutik bost bat kilometrora dago Durako ikastola eta Hezkuntza Sailak jantokiaren kudeaketa zuzena bere gain hartu zuenean ezarri zuen neurri hori.

EAJko legebiltzar-taldeak aurkeztutako legez besteko proposamena eztabaidatu eta onartu zen atzo Gasteizko Legebiltzarrean. PPk, Aralarrek eta EAk proposamenaren alde egin zuten. 2000. urteko martxoaren 22an eskola-jantoki publikoak arautzen dituen agindua onartu zen. Agindu horrek dioenez, kudeaketa zuzenaren sisteman parte hartzeko, eskolek berariaz kudeaketa zuzeneko jantoki-zerbitzuaren aukera egin eta Sailak antolatu eta finantzatutako eguerdiko garraioari uko egin behar diote.

Hala ere, agindu horrek salbuespenak ere jasotzen ditu eta horietako bat izan zen PSEk izan ezik gainerako alderdiek defendatu zutena. Zentzu horretan, Legebiltzarrak hau eskatu dio Lakuako Hezkuntza Sailari: «Ikasbidea ikastolari, bere kokapen geografikoa dela-eta, 2000ko martxoaren 22ko aginduan aurreikusitako salbuespenezko baimena ematea» eta eskatzen duen ikasle orori eguerdietan garraio zerbitzua erabiltzeko aukera bermatzea, «bere ikas maila eta bizilekua edozein delarik».

Gurasoek banatutako esku orrietan euren testigantzak jaso zituzten. Egungo egoerari erreparatuz gero, besteak beste, 5 eta 7 urteko bi mutikoren amak azaltzen du nagusienak etxean bazkaltzen duela eta txikiak, ordea, ezin duela etxera joan.