Iturri gehienen arabera, aste honetan etorriko den baieztapen ofizialaren zain, gaurkoa izango da ziur asko Juanfran Torresek Osasunarekin jokatuko duen azken partida. Ezusteko handiren bat gertatzen ez bada, Atletico Madrilen jokatuko du erdilariak aurrerantzean 5 milioi euro ingururen truke. Aurretik, baina, ospea eman dion taldea kirol egoera osasuntsuan uzteko, lehia garrantzitsua izango da gaurkoa, Kopan pattalaldia erakutsi duen Getaferen aurka. Bide batez, taldearen kirol egoera hobea edo erosoagoa den heinean, errazagoa dirudi, jokalariak nahi duen bezala, fitxaketa ahalik eta azkarren gauzatzea.

Protagonista nagusiak ez du gaiaren inguruan hitz egin nahi izan, baina Twitter sare sozialean argi mintzatu da. «Denentzako oharra!!!... Oraintxe gehien arduratzen nauena Getaferi irabaztea eta horren garrantzitsuak diren hiru puntuak nire taldekideekin ospatzea da». Jasotako erantzunen artean, egun Real Madrilen ari den Arbeloarena da, agian, argigarriena. «Zorte on asteburu honetan! Kopan ikusiko dugu elkar» idatzi zion, Madrilgo bi taldeek elkarren aurka jokatu beharreko derbiaren inguruan.

Bere garaian Jose Antonio Camachok Juanfranek taldea ez zuela utziko uste zuela esan zuen arren, ez zen horren ziur agertu atzo emandako prentsaurrekoan. Entrenatzaileak adierazi zuenez, ez du Pachi Izcorekin gaiaz hitz egin, «baina diruak agintzen du. Ez dakit Atletico Madrilek Osasunak eskatutakoa ordainduko duen. Juanfranek alde egiten badu, merkatuak hala agintzen duelako izango da».

Erdilariaren hutsuneak taldean izan dezakeen eraginaren gainean ez zuen sakondu nahi izan murtziarrak. «Gertatzen bada, ikusiko dugu taldeak nabaritzen duen ala ez. Titular garbia da, baina ez du gertatu aurretik horren inguruan hitz egitea merezi», gaineratu zuen gorritxoen entrenatzaileak.

Hori bai, aste osoan gaiaren inguruan horrenbeste hitz egin izanak jokalariarengan izan dezakeen eraginak nolabaiteko kezka eragiten dio. «Erabat zentratua ez baldin badago, noski arduratzen nauela, baina ez dut horretarako motiborik ikusten. Bera oso profesional ona da eta ez diot ezer berezirik nabarmendu. Beste gauza bat da hobeto edo okerrago jokatzea eta horren errua zurrumurruei leporatzea, baina ez dugu inolako zalantzarik», gaineratu zuen Jose Antonio Camachok.

Zailtasunak hasi aurretik

Gauza da, aurretik duen egutegia ikusita -etxetik kanpo bi partida jokatu behar ditu eta Real Madrilen bisita izango du Sadarren-, gaurkoa oso partida garrantzitsua dela gorritxoentzat. Izan ere, azken bost partidetan bi puntu baino ez dituzte eskuratu nafarrek eta jaitsiera postuak lau puntu eskasera hurbildu dira.

Hamaikakoari dagokionez, badirudi Camachok ez duela zalantza handirik izan deialdia osatzeko; prest dituen hemezortzi jokalariak sartu ditu, eta bi berrikuntza izan daitezke Getaferen aurka. Ziurra ematen du Lolok Puñalen aldamenean jokatuko duela zelai erdian eta honek Vadocz hungariarra punta erdiko lanak egitera eramango du. Aurrean, lesiotik osatuta, Camuñas taldera itzuliko da eta badirudi sendagiria atzo bertan jaso zuen Pandianik ez duela, hasieratik behintzat, jokatzeko aukerarik izango.