Estiloz eta formaz eraberrituta dator Nontzeberri.com ataria. Suspergintza elkartearen egitasmo honek kultura sarean hedatzea du xede, eta pasa den urtean proiektua taxutzen aritu ostean, dagoeneko martxan dago eta erantzun paregabea ari da izaten. Iñaki Landa webguneko diseinatzaileak GARAri adierazi dionez, bisitari kopurua bikoiztu egin da aldaketarekin.

«Nontzeberrik, bizitzeko modu kultural bat, kezkabide ezberdinak, kulturaz beteriko mundu horretan gertatzen ari denaz ohartzeko bidea ahalbidetuko du», azaldu dute kideek. «Hala, euskal blogosfera osatua eskainiko du, bideorik interesgarrienak eta ikusienak, musika talderik berrienen gaineko informazioa, oso ezagunak diren hainbat lehiaketa, asteroko elkarrizketa interesgarriak, eta horrez gain gure zerbitzu berriak: Infokultura, Asteko Plana eta bannerrak».

Azken horiek dira, hain zuzen ere, nobedade nagusiak. Infokulturaren bitartez, kultura arloko eragile publiko zein pribatuei laguntzen diete helarazi nahi duten informazioa zabaltzen mailing-aren bitartez. Bannerren bidez, publizitateari atea ireki dio Nontzeberri.com atariak.

Bestalde, posta-zerrendan alta emanez gero, Asteko Planaren bidez, zazpi ekitaldirako proposamenak bidaltzen dituzte boletin informatibo kultural gisa.

Artea, bertsoak, literatura, musika... sailetan antolatuta ageri dira albisteak atari berrian eta sortzaileei euren lana zabaltzeko tartea ere eskaintzen diete Argazkigelan -nahi duenak bere irudiak zintzilikatu ditzake bertan- edo KaleSoun txokoan. Euskal musika taldeek euren kantuak bidal ditzakete bertara, eta Nontzeberri irratian daude entzungai.