Hauteskunde orokorrek eragin ohi duten legez, ikusmina izugarria zen atzo Kanadan; are gehiago Quebecen, azken asteetako inkestek hogei urteetan boto gehien jaso dituen Bloc Quebecois alderdi independentistaren beherakada nabarmena iragarri ostean. Nanos Research agentziak atzo jakinarazitako datuen arabera, %23,9an kokatu du independentistekin bat egiten dutenen kopurua, hots, pasa den martxoarekin alderatuz hamabost puntu beherago. Horrek izugarri alda dezake Quebeceko abagune politikoa, Bloc Quebecoisen indarra dozena bat diputatutara mugatuta gera bailiteke, herrialdeko laugarren indarra izatera igaroz.

Independentisten beherakada NDP sozialdemokrataren mesedetarako izango dela dio, halaber, agentzia horren azterketak, martxoan jasotako %14ko sostengua %37,4ra igo baita hilabeteotan. Adituek diotenez, Quebecek hautatu behar dituen 75 diputatuetatik 40 eskura ditzakete sozialdemokratek. Ez dute uste, dena den, NDPko sozialdemokratei independentisten gainbeherak bakarrik egingo dienik mesede, kontserbadoreek zein liberalek ere boto galera izango dutela baitiote inkestetako datuek.

Nolanahi ere, Bloc Quebecois alderdiaren galgak eragin du ezinegon gehien herritarren artean. Pasa den astean, hain zuzen, NDP alderdiaren aldeko botoa eskatuz gutuna igorri zuten Bloc Quebecoiseko bi kide esanguratsuk komunikabideetara, eta horrek are gehiago bizitu ditu kezkak. «Sozialdemokratak Parlamentuaren atarian aurkitzen dira. Tristea litzateke gure herriaren elkartasun eta justizia baloreak defendatzeko Ottawara diputatuak bidaltzeko aukera baliatuko ez bagenu quebectarrek», argudiatu zuten gutunean.

Aldaketa egarria

Herritarren aldaketa-egarria aintzat hartuta justifikatzen dute adituek independentisten beherakada. Azken urteetan ere sektorearen apalaldia nabaria zela diote; 2004ko bozetan 54 diputatu lortu zituzten, 51 ordezkari handik bi urtera eta 49 diputatu 2008ko hauteskundeetan. Alabaina, 1990eko hamarkadan eratu zenetik, Bloc Quebecoise independentistak ez zuen sekula horrenbesteko jaitsierarik izan, eta horren arrazoien azterketara eraman ditu aditu asko eta asko.

Kontuak kontu, azken emaitzak berebiziko garrantzia izango du, ez bakarrik Queceben, baita Kanada osoan ere. Independentziaren auzia ezegonkortasunaren zio nagusietako bat izan da herrialdean; 1980. eta 1995. urteetan, bina galdeketa burutu zituzten independentziaren inguruan, eta ezezkoak irabazi arren, oso alde txikiarekin egin zuten ¯sei hamarreneko besterik ez azken horretan¯. Halaber, Quebec da Kanadako Konstituzioa ontzat ematen ez duen probintzia bakarra.

Goizeko 08:30etan ¯06:00ak Euskal Herrian¯ zabaldu zituzten atzo hauteslekuak, eta emaitzak gaur arte argituko ez diren arren, askok ziurtzat ematen dute independentisten porrota.