Israelek Gazari ezartzen dion blokeo egoera arintzea eta bertara giza laguntza eramatea helburu duten ekintzaileak hasi dira dagoeneko Mediterraneoko portuetan elkartzen. Askatasunaren Bigarren Flotilla osatzen duten giza eskubideen aldeko erakundeek esana zuten hil honen bukaera aldera irtengo zirela Gazarantz, baina oraindik ez dute jakinarazi noiz partituko diren. Alabaina, flotilla osatuko duten hamabost ontziak eta haraino eramango duten materiala pilatzen hasi dira zenbait portutan, Grezian eta Turkian, zehazki.

Ekintzaileek ere hartu dute portuetarako bidea; Turkia, Grezia, Suedia, Herbehereak, Kanada, Alemania, Belgika eta Suitzatik abiatuko dira, besteak beste. Herenegun, hain zuzen, New Yorketik Atenaserainoko hegaldian ontziratu ziren 30 bat ekintzaile, «1,6 milioi lagun bortxaketa etengabe batera kondenatzen dituen egoera salatzeko asmoz».

Atzo, berriz, «Gernika» barkuan ontziratuko diren bi euskaldunak, Edorta Jimenez eta Mikel Zuluaga partitu ziren Madrildik «Mediterraneoko portu galdu baterantz». Estatu espainoleko ordezkaritza osatuko duten partaideekin elkartu ziren bertan, eta denen izenean, Willy Toledo aktoreak hartu zuen hitza: «Gobernuak egin beharko lukeena egitera goaz, Israel Gazarekiko bidegabeko blokeoa amai dezan behartzera», azaldu zuen Madrilgo Gobernua kritikatuz. Haiek ez dute ekimen hau sostengatu nahi izan; areago, bertan parte har ez dezatela galdegin die ekintzaileei. «Ez genuen askorik espero NATO bezalako erakunde kriminal batean parte hartzen duen Gobernu batengandik, are gutxiago Libia bonbardatzea ekintza humanitario gisa definitzen duen exekutibo baten partetik», gaineratu du aktoreak.

Israelek flotillaren aurka oldartuko dela mehatxu egin du, eta horren aurrean, iaz bezala, erresistentzia baketsua baliatuko dutela adierazi dute ekintzaileek, joan den urteko sarraskia errepikatuko ez den itxaropenez.