Kongresuen arteko organo nagusia da nazio biltzarra eta bere funtzio nagusia sindikatuaren esku-hartze esparru eta dinamikak finkatzea eta ebaluatzea da. Bilkura honetan, zuzendaritza batzordeko kideez gain, eskualdeetako zein sektoreetako ordezkariek hartu zuten parte.

Atzoko nazio biltzarrak hasi berria den ikasturtean LABek izango dituen erronka eta lan ardatz nagusiak izan zituen aztergai, eta bertan aparteko lekua izan zuten langileen eskubideen aurkako erasoek eta murrizketa sozialek. «Aurreko kurtsoa murrizketa gehiago etorriko zirela iragarriz amaitu genuen, eta murrizketak norainokoak diren ikus daiteke orain».

Biltzarrean eztabaidatutako ebazpenek gogor salatzen dute patronalaren jarrera, krisiaren aurrean «ez duelako erantzukizunik bereganatzen» eta «lanpostuak suntsitzearen mehatxuaz baliatzen ari delako» bere «betiko neurriak» ezartzeko. «Soldatak jaistea, lan baldintzak okertzea, lanaldia malgutzea eta babes publikoa kentzea dira patronalak aplikatu nahi dituen neurriak», zerrendatu ditu.

Patronalaren asmo hauei, murrizketa sozialei eta langileen eskubideen aurkako erasoei aurre egiteko, LABek delegatuen batzarrak eta mobilizazioak antolatu ditu Hego Euskal Herriko lau herrialdeetan, lehena urriaren 3rako, astelehena.

«Badira alternatibak»

Nazio biltzarrak ere klase politikoaren erantzukizuna nabarmendu zuen, «herritarren borondateari bizkar eman diotelako, aldaketa sozialaren bidea debekatuz».

Hala ere, LABen iritziz, «badira alternatibak» eta dei egiten dio klase politikoari «behingoz erantzukizun politikoz jokatzen has dadin, abian jartzen diren politiken norabidea aldatzeko». Era berean, euskal langileei «klase politikoa horretara behartzea» eskatu die. Gai hori aurtengo ikasturtean sindikatuaren lan erreferentzietako bat izango dela iragarri dute.

Honekin batera, aldaketa bidea jorratzeko lankidetza deia egin zuen atzo nazio biltzarrak, bere ustetan behar-beharrezkoa baita eremu sindikalaren eta politikoaren arteko lankidetza. «Benetako aldaketak bultzatu nahi ditugun eragile politiko eta sindikalen arteko eztabaida irekitzeko unea da», aldarrikatu zuen LABek, eta bide horretan prest agertu zen «bide berri hau lankidetzaren bidez jorratzeko».

Egoera ekonomiko ilunaren alboan, bestalde, azaroaren 20ko hauteskundeei begira Euskal Herrian «egoera politiko berria» indartzen ari dela ere uste du LABen biltzarrak, eta oso positibotzat jotzen du «eremu ezkertiar eta abertzalean abiatutako iniziatiba, alderdikerien gainetik bat eginez»; izan ere, «herri honen eskubideak defenditzeko unea» dela uste du.

Zentzu horretan, ekimen bateratua bultzatzen duten alderdiei zera eskatzen die, «politika ekonomiko, laboral eta sozialak hemen erabaki ahal izateko eskubidearen defentsa bere egin dezatela, hau da, Lan Harremanetarako Euskal Esparruaren defentsari hel diezaiotela».

Eremu politikoan, halaber, «Bateragune auziko» epaiaren larritasuna berretsi du, eta sindikatuko idazkari nagusi izandako Rafa Diez zein auzi honetan zigortuak izan diren kide guztiak «inolako baldintzarik gabe aske uzteko» exijitu eta datozen asteetan egoera politikoaren gaineko gogoeta irekiko duela iragarri du.