Haurren Eguna ospatuko da gaur Basauriko San Fausto jaietan. Egunero legez, erraldoi eta buruhandien kalejira izango da, baina oraingoan berezitasun batekin «gaurkoan herriko kuadrillek eta alkateak berak ere, alkate txikiei lagunduko diete, Balendin Berriotxoa kaletik hasita, Velazquez ikastetxeraino, eta bertatik alkate txikiek hitzaldia eman eta txupinazoa botako dute», Itxaso Martinez Herriko Taldeen bozeramailearen hitzak dira. Ondoren, ikastetxeko patioan, bitan banatutako haur parkearen irekitzea ospatuko da. Alde batetik, 0-6 urte arteko umeentzako ekintzak izango ditu, eta bestetik, 6 eta 12 urte bitartekoentzat.

Arratsaldean, 19.00etan, eta nobedade gisa, 18 urtetik gorakoentzat, Zurraren Prix handia egingo dute Arizgoiti plazan, «Zurrakapotea Basauriko festetako edari ospetsua izango da protagonista, eta herriko kuadrillak proba desberdinak egingo dituzte», dio Martinezek. Ordu erdi beranduago, Luma Gorri taldearekin haur berbena ospatuko da Solobarria plazan.

Kirolak ere bere tokia izango du haurrentzako egun honetan, 20.00etan Miradoreetatik hasita, herriko kaleetan zehar haurrentzako gaueko milia antolatu du Basauriko atletismo elkarteak; 21.00etan, aldiz, ibilbide luzeago batekin, helduen txanda izango da.

Eguna bukatzeko, 22.30ean Inkubo eta Higlights herriko taldeek kontzertua eskainiko dute Arizgoiti plazan. Gauerdian bestalde, Insershow II. emanaldia ospatuko da plaza berean «berbena izateaz gain, bertaratutakoek kantatzeko parada ere izango dute; horretarako, ekitaldia hasi aurretik eman behar dute izena», azaldu du Itxasok.

Barrakak merkeago

Haurren Eguna izanda, Basauriko Azbarren auzoan dauden barrakek ere eskaintza berezia egitea erabaki dute. Hartara, gaurkoan haurren atrakzio bakoitzak euro bakarra balioko du. Horren harira, Basauriko Udaleko Kultur zinegotzi Etorne Lexartzak jaien aurkezpen ekitaldian gainerako egunetarako barraken prezioen berri eman zuen.

Haurren barrakak iazko prezioan daude aurten ere: 1, 80 euro. Hala ere, haurrentzako bonuak merkeago daude eta bidaia bat gehiago egiteko aukera dute (zortzi bidaiako bonuak hamar euroan jarri dituzte eta iaz prezio horretan zazpi bidaia egiteko aukera zegoen). Helduentzako atrakzioen prezioa ere jaitsi da; iaz, 2,20 euro balio zuten, aurten, aldiz, bi euro.

Ostiralean, San Fausto egun handiaren bezperan, Mojaparte plazan, 11.00etan, lehendabizikoz ospatuko diren haurrentzako kuadrilla arteko jokoak nabarmendu ditu Martinezek: «Sokatira, partxisa, edo zaku lasterketa probak izango dira, baita irabazleentzako sariak ere; hala ere, garrantzitsuena ondo pasatzea izango da».

Ordu berean, elkartasun azoka antolatuta dago Solobarria karparen inguruan, Itxasok azaldu duenez, «bertan kuadrillek zein herritarrek artisautza lanak salduko dituzte, eta lortutako dirua, Joseba Chaparro, gaixotasun arraroa duen basauriarra sendatzeko bideratuko da».

Ordubete beranduago, herri kirol saioa ospatuko da San Fausto plazan; aizkolarien Bizkaiko txapelketa eta idi-probetan 2.000 kiloko harria eramateko erronka. Arratsaldean, 19.00etan, Solobarria plazan bertso saio bikaina entzuteko aukera; bertan izango dira besteak beste, Maialen Lujanbio, Amets Arzallus eta Jon Maia bertsolariak. Gauerdian bestalde, Arizgoiti taldearen eskutik berbena izango da San Fausto plazan.

Etzi, egun handia Basaurin

Urriaren 13an, larunbata, San Fausto egun handia dute Basaurin. Itxaso Martinezek 11.00etan San Fausto kaletik abiatuko den prozesioa eta santuari egingo zaion lore eskaintza aipatu ditu; «herriko kuadrillak zein herritar ugari biltzen dira San Pedro elizaraino doan San Fausto omentzeko martxan».

Goizean zehar, halaber, nekazaritza produktuen 25. erakusketa ospatuko da Uribarri kalean, eta horrek dirauen bitartean herri kirolen erakustaldia izango da Mojaparte plazan. Horrez gain, artisau gazteen erakusketa izango da Solobarria plazan.

Horiek horrela, eguneko ekitaldi berezi eta klasikoenak iritsiko dira ondotik. 15.00etan Arizgoiti plazan kuadrillen bazkaria eta sabela bete ondoren, 17.15ean, San Fausto plazan izango den kuadrillen arteko txapelketa. «Sokatira txapelketa, txorizo jana edota txapela jaurtiketa probak izango dira», azaldu du Martinezek. Gauean, 23.00etan, Arizgoiti plazan Los Secretos taldeak kontzertua eskainiko du, eta ordubetera, Continente taldearen berbenak herria dantzan jarriko du San Fausto plazan.

Kanpainak eta azken eguna

Herriko taldeek indarkeria matxistaren aurkako eta drogen gehiegizko kontsumoaren gaineko kontzientziazio kanpainak ere jarri dituzte martxan. Horiek horrela, eraso sexisten aurrean nola jokatu jakiteko aholkuak emateko karpa jarri dute Arizgoiti plazan, eta leku berean, gaur, 00.00etatik goizaldeko 3.30era, droga maila neurtzeko standa jarri dute.

Igandean, jaien azken egunean, 9.00etan XV. Bakailao Lehiaketa egingo dute Solobarria plazan; «kuadrillek baino herritarrek hartzen dute parte lehiaketa honetan», esan du Itxasok. Ordu erdi beranduago, 34. Artisautza Azoka izango da ikusgai Uribarri kalean, eta horrek dirauen bitartean herri kirol erakustaldia ospatuko da Mojaparte plazan. Bestalde, eta nobedade gisa, 11.00etan, auto klasikoen bilkura izango da San Fausto plazan.

Arratsaldean, 17.30ean, Los palmeras taldearekin, nagusientzako «txitxarrilloa» izango da Mojaparte plazan, eta ordu berean, oinezkoen kaleetatik abiatuta eta Mojaparte plazaraino The Piojos Show txikientzako haur kalejira ibiliko da herrian zehar.

Horiek horrela, arratsaldeko zortzi eta erdietan amaituko dira aurtengo jaiak. Alde batetik, jaietan zehar izandako txapelketetako sariak banatuko dizkiete herriko kuadrillei eta horien artean kuadrilla arteko sari nagusia. «Txapelketa guztien batez besteko puntuazioa batuz, urtero kuadrilla onena saritzeko ohitura dute Basaurin; aurten, Basauriko astoen estatua famatuaren erreplika txikia banatuko diegu», dio Martinezek. Azkenik, puxikak airera bota eta horiekin batera Eskarabillera maskotaren burua jaurtita agurtuko dituzte sanfaustoak datorren urtera arte.