Krisi ekonomikoari ezohiko irtenbidea eman nahi diote Sakanako herritarrek. Horregatik, Sakantzen sarearen bitartez, hainbat hilabete daramatzate langabeziak kolpatutako eskualde hau berpiztu eta egoerari nola aurre egin aztertzen. Atzo, 150 bat lagun bildu ziren Sakanako herri ezberdinetan «brainstorming» edo «ideia burrunba» baten bitartez jarduera ekonomiko berriak garatzeko ekarpenak egiteko asmoz, eta, antolatzaileen hitzetan, emaitza «ezin positiboagoa» izan da.

Jardunaldiok Irurtzun, Irañeta, Uharte Arakil, Lakuntza, Arbizu, Etxarri Aranatz, Bakaiku, Iturmendi, Urdiain, Altsasu, Olazti eta Ziordian egin zituzten. Parte hartzaileen profilari dagokionez, aniztasun handia dagoela nabarmendu zuen Jon Etxeberria Sakantzen sareko kideak. Izan ere, eskualdean langabezia handia den arren, sarea, langabeez gain, lanpostu bat izanda ere Sakanari etorkizun bat eman nahian egitasmo berriak garatzera animatu den jendeak ere osatzen du.

Krisiaren ondorioz Sakanako industriak beherakada nabarmena izan du eta asko dira itxitako enpresak. Horregatik, egoera iraultzeko tresnak eta proiektuak herritik etorri behar direla uste du Etxeberriak, eta horretarako ekintzailetasuna indartzea ezinbestekoa dela nabarmendu zuen.

Proiektu zehatzak

«`Sakana' marka moduan sortzea»; horixe da atzo ateratako ondorio nagusia, Etxeberriak azaldu zuenez. Krisiari eskualde gisa erantzun bateratu bat ematea dute helburu eta, bide horretan, herri bakoitzak lana bere aldetik egin beharrean, Sakana erdigune izango duen proiektuak abiatzeari ekin diote.

Ugariak izan ziren atzo argitara ateratako ideiak eta oraindik sakonean aztertu eta findu behar diren arren, gehienak gauzagarriak direlakoan daude. Eskualdeko lehengaiak eta turismoa dituzte ardatz egitasmo gehienek. Esaterako, «Patxaranaren ibilbidea» osatzea proposatu zuten. Sakanan patxarana egiteko dagoen ohiturari erantzunez, ezagutza hori enpresa bat sortzeko baliatu eta ibilbide turistiko bat garatzea izango litzateke ekimenaren helburu nagusia.

Bestetik, krisia dela-eta hutsik gelditu diren enpresei erabilera emateko bideak hausnartu zituzten. Adibidez, eskualdeko ekintzaileei alokatzea otu zitzaien, euren proiektuak abiatzeko «hasierako espazio» gisa.

«Orain arte industriaz bizi izan gara, eta orain enpresa pila bat ixtean Sakanak ikusten du turismoan lan asko egin daitekeela», baieztatu zuen Etxeberriak. Zentzu horretan, eskualdeak dituen baliabide naturalei zukua ateraz jarduera turistikoa indartuko duen enpresa bat sortzea proposatu zuten. Auzolanean, aurrerantzean mamitzen joango diren proiektuen lehen harria jarri zuten atzo.