Bildu, Aralar, Hamaika Bat eta EAJko udal taldeen aldeko botoekin, eta PSEren abstentzioarekin, Usurbilgo udalbatzak herri batzarrak aurkeztutako mozioa onartu zuen atzo ez-ohiko bileran. Mozioan Gobernu espainolari presoen eta horien hurbilekoen giza eskubideak errespeta ditzala eskatzen diote, «Europako Giza Eskubideen Auzitegiak 2012ko uztailean emandako epaia bete dezala» 197/2006 doktrina indargabetuz eta Ramon Uribe aske utziz, «joan den abenduaren 3an zigorra bete zuelako, eta beraz, lege espainolek diotenaren arabera, kalean egon beharko lukeelako».