Bere etxea izanagatik edo pilotaleku industrialetan historiarik handiena duena izanagatik, Eibarko Astelena frontoia, «pilotaren katedral» ezaguna, arazo handi bihurtuta zegoen Asperentzat. Pilotalekua goraino betetzen zeneko garaiak iraganekoak ziruditen eta horrenbeste pilotakada eta partida bikain ikusitako harmailek oso itxura tristea erakutsi dute igande ugaritan. Arazoaz jabetuta, gastronomia eta pilota uztartzen zituen ekimen bat jarri zuten martxan, baina ez zuen espero zen arrakasta izan. Halere, zorionez, urte berriarekin eta txapelketa berriarekin batera, Binakakoak behar eta merezi zuen hauspoa eman dio Isasi kaleko pilotalekuari.

Txapelketa honetan, bost jardunalditan sei partida jokatu dira Astelenan eta pilotazaleen lorpena bikaina izan da, baita Gabonetatik aurrera ere, 800dik gora zale bertaratu baita horietako bakoitzean. Ezin zuen bestela izan eta Iñaxio Errandonea Aspeko zuzendari komertzialak oso balorazio positiboa egin du urte hasiera honetaz. «Kontuan hartuta Eibarrek duen historia, egia da azken urtean agian ez genituela partidarik egokienak eraman pilotaleku horretara. Beste pilotalekuekin konplitu behar izan genuen eta aurten, nire ustez, gehiago zaindu dugu gai hori. Partida onak irten dira, txapelketak berak jendea erakarri du eta oso pozik gaude», azaldu zion GARAri.

Autokritika ariketa osasuntsu horren atzetik, Berako pilotari ohiak Binakakoak jendearen artean sortzen duen erakarpenean jarri du aldaketaren gakoa. «Zerikusi handia du txapelketak berak. Binakakoa ederki hasi da, nahiz eta orain lesio garrantzitsu bat izan den -Xalarena-, baina ondo hasi da eta jendea `engantxatu' egin da, ez Eibarren bakarrik. Orokorrean jende asko dabil pilotalekuan eta gaur egunean hori oso handia da guretzat. Momentuz oso pozik gaude txapelketa orokorrean hartuta».

Lehiakortasuna

Eguraldiak bere garrantzia izan dezakeen arren, udan zailagoa da jendea pilotalekuetara eramatea. Binakako partidetan orokorrean izaten den lehiak erakartzen du gehien pilotazalea, Buruz Buruko txapelketarekin konparatzen badugu. Horretan, enpresek euren lana ondo egin dutelakoan dago Iñaxio Errandonea, iazko txapelketan zenbait kritika jaso ondoren.

«Joan den urtean enpresa bakoitzak bikote oso indartsu bat jarri zuen, baina ondoren logika horrek ez zuen funtzionatu. Bikote horiek ez ziren finalera iritsi; bat ez zen finalerdietarako ere sailkatu. Faborito izate horiek pilotalekuan erakutsi behar dira. Aurten berriz, paperaren gainean, oso txapelketa berdindua antolatu dugu eta oraingoz horrela irteten ari da. Jendea gustura dago. Partida oso onak irten dira gainera. Partida on asko ikusi dugu orain arte eta jendea `engantxatu' egin da», adierazi zuen Aspekoak.

Nolanahi ere, Eibarkoaz gain, izan da beste ezusteko gozorik aurtengo Binakakoan. Ahaztua zegoen Donostiako Atano III.a pilotalekuan ere sekulako arrakasta lortu baitute, Gipuzkoako Federakuntzarekin eta Donostiako Udalarekin elkarlanean. Urtarrilaren 4an gauez jokatutako partidan jendea frontoira sartu ezinda geratu zen eta, Inaxio Errandonearen hitzetan, emaitza bikain hori Federazioko kide berriek izan duten lanerako eta gauza berriak probatzeko grinari eta elkarlanean aritzeko borondateari esker lortu ahal izan da.