Asanblea Nazionala atzo hasi zen sexu berekoen arteko ezkontza aztertzen. Eztabaidak luze joko du. Bi aste irautea aurreikusten dute, bilkurak gauez eta guzti egingo dira, eta beharrezkoa izanez gero, asteburuetan. 5.300tik gora zuzenketa aurkeztu dituzte legebiltzarkideek, gehienbat eskuindar taldeek. Oposizioak gainera, ezkontza homosexualaren onarpena erreferendum bidez bozkatzeko mozioa aurkezteko asmoa du. Dena den, ez du aurrera egiteko aukera askorik.

Kalean, bien bitartean, aldekoek zein kontrakoek presio egiten jarraitzen zuten. Igandean, homosexualen eskubideen aldekoek manifestazio erraldoia egin zuten Parisen.

Eta atzo, hiriburuko hainbat zubitan bozkatu beharreko lege proiektuaren kontrako pankartak ipini zituzten. «Ama eta aita ezinbestekoak dira», «seme-alabak ez dira eskubide bat» edo «guztiok emakume eta gizon batetik jaio gara» irakur zitekeen horietako batzuetan. Civitas muturreko talde katolikoak otoitza bat antolatu zuen Asanblea Nazionalaren aurrean.

Talde bakoitzaren jarrera, jada, aski ezaguna da. Eskuinaren hitzetan, Eliza katolikoaren sostenguarekin, ume batek aita eta ama baten beharra du, hau da, sexu desberdinekoak. Ezkerrak, aldiz, eskubide berberak aldarrikatzen ditu pertsona guztientzat eta haien seme-alabentzat. «Ez dago arrazoirik Estatuak bikote heterosexualak babesteko eta ez egiteko gauza bera sexu berekoak diren bikoteekin», adierazi zuen igandean Christiane Taubira Justizia ministroak. Berari egokitu zaio lege proiektua Asanblea Nazionalean defendatzeko ardura.

Jean-Marc Ayraul lehen ministro frantsesak argi utzi zuen legea ez zela kaleetan erabakiko, bi aldeetako presioei erantzunez. François Hollande presidenteak ezkontza eskubidea «guztiontzat» izango zela esan zuen hauteskunde kanpainan.

Ifop institutuak argitaratu zuen inkestaren arabera, biztanleriaren %63k begi onez ikusten du sexu berekoen arteko ezkontza. Adopzio eskubideari dagokionean, ordea, kontrakoak %51 dira, eta %49 aldekoak.