Pasa den astean e-mail andana jaso nuen. Anaiak eta auzokide alaiak, Info7 irratiko esatariak eta ordu txikitako bertsolariak, Naiz.info webguneko langileak eta ezkaratz garbitzaileak, GARAko kazetariak eta azken bola txinatarren pentsalariak, inoiz kasurik egiten ez didanak eta gainetik kendu ezin ditudanek... Denek mezu bera, link bat, bideo bat, McNamararen olatu erraldoiaren irudiak, hitzik ez.

Ez dakit, letra, kontsonante, silaba, hitz, esaldi edo paragraforik gabeko e-mail horiekin igorri nahi didaten mezua zein den. Bideo famatuan Garret McNamara agertzen da Portugalen, Nazareko urautsian moto baten laguntzaz hartu duen olatu erraldoi bat jaisten. Orain arteko handiena omen da. Eta, beraz, McNamarak Nazaren hartu duen olatu horren inguruan dudan iritzia jakin nahi duzue?

Hasteko, esan, egun horretan bertan Axi Muniain zarauztarra han bertan zela, uretan, eta ikaragarrizko olatuak hartzen ibili zela. McNamarak hartu zuen olatu hura berak ere har zezakeela, zeren tamaina horretako olatuak ia kilometro bat lehenago hasten dira hartzen; beraz, gero nolako tamaina izango duen jakitea ezinezkoa da.

Halako itsaskietan itsasoratzen diren surflarien ametsa da McNamarak egin zuen balentria hura egitea. Ez dakidana da olatu hura Axi Muniainek hartu izan balu, hainbesteko oihartzuna izango lukeen.

Bestalde, Portugalgo azken saio horrekin, olatu handien aferak gailurra jo duela uste dut. 30 metrotik gorako olatuetan dimentsioak lausotu egiten dira, tamainaren eztabaida antzu bilakatzen da, halako baldintzetan oso erlatiboa baita neurria.

Aldagai askok eragin dezake; hala nola, surflariaren kokapenak, olatuaren formak, irudi hartzaileek duten perspektibak, eta abar. «Freaky lover» deitzen dudan lagun batek dioen moduan, «kontua ez da igortzen den mezua, jasotzen dena baizik». Irudien munduan, sarri, olatu txiki batek handiagoa ematen du, eta alderantziz, olatutzar batek ñimiñoa dirudi.

Altueraz gain, kontuan har daitezkeen beste faktore anitz dago. Ez da gauza bera bi metroko olatu bat Mundakan edo Hendaian. Towin edo motoz lagundutako modalitate honetan gero eta garrantzia handiagoa hartuko duen aldagaia izango da aurrerantzean olatuaren izaera. Hau da, altuerak gailurra jo du, 30 metrotik gorako olatuak hartu dira, hori baina altuera handiagoa izan dezakeen uhina sortzeko mundu honek duen espazio fisikoa mugatua da, baita haizeteek sor dezaketen itsas kuzkurra ere. Towin modalitateari geratzen zaion erronka bakarra, beraz, altuera bakarrik ez, olatuaren zabalera ere kontuan hartzea da.

Aurrerantzean, nire ustez, arraun egindako olatu handietan dago erronka. Zenbaterainoko altuera duen olatua har dezake gizakiak? Non da mugarria? Horra betiko galdera, erantzun bila abiatu den surflari asko bidean eraman dituena. Muga non dagoen naturak berak erantzungo du.