Siriako oposizioaren barruan dauden desadostasunek agerian utzi dute, gerrarekin batera, eskualde osoan gertatzen ari den botere borroka, dirua, armak eta propaganda tarteko. Alde batetik, Qatar-Turkia ardatza, Anaia Musulmamen aldekoa; bestetik, Saudi Arabia, AEBetako politikaren jarraitzailea.

«Gure herriak horrelako tutoretza inposatuari uko egin dio. Eskualdeko eta nazioarteko desadostasunek nahastu dute egoera», adierazi zuen Ahmed Muaz al Khatibek, Oposizioko Koalizioaren buruak, joan den asteartean Dohan, Liga Arabiarraren gailurrean.

Aldi berean, oposizioko ia 70 ordezkarik, Ligari igorritako mezu batean, salatu zutenez, Koalizioaren korronte batek, Anaia Musulmanek alegia, baztertze politika dute eta Qatarri egotzi diote «eskandaluzko hegemonia» bilatzea.

«Bi ardatz nagusien arteko indar-borroka dago. Ez dute oposizio osoa ordezkatzen, baina laguntza materiala eta militarra lortzeko ezinbestekoak dira: Qatar-Turkia ardatza, Anaia Musulmanak laguntzen duena, eta saudiarabiarren ardatza, AEBekin bat datorrena», adierazi du Ziad Majedek, Parisko Unibertsitate Amerikarreko Politika Zientzietako irakasleak. «Horrek eragina du oposizio politikoaren osaketan eta talde militar ezberdinen loturetan», gaineratu du.

Joan den astean, Istanbulen egindako bilera batean, Koalizioko kideek desadostasunak erakutsi zituzten «behin-behineko gobernua» ezartzeko orduan, Siria barruan kontrolatzen dituzten lurraldeak kudeatzeko.

Batuzk Ghassan Hitto, «lehen ministro» hautatua, Qatarren hautagaia zela salatu zuten. Beste batzuek, Koalizioa utzi zuten.

Majeden esanetan, «ardatz saudi-amerikarrak nahiago luke gobernu horren osaketa atzeratzea, eta Qatar-Turkiakoak, aldiz, bizkor jarri nahi du martxan eta Hitto aukeratzeko presioa egin du».

Eskualdeko potentzia bihurtzeko asmoz, Golkoko monarkia aberatsen eta Turkiaren arteko lehia, arlo militarrera ere pasatu da. Istanbuleko bileraren ondoren, Riadek «Siriako Armada Askea Hittoren hautaketa ez onartzera bultzatu zuen», azaldu du oposizioko kide batek. Darayan dauden borrokalariek diotenez, hiria galtzeko zorian zeuden arma gutxi zutelako, hiru hilabeteko setioa jasan ondoren. Baina Khatibek erregimenarekin elkarrizketa proposatu zuenean, «armak berehala iritsi ziren», bere ustez «gatazka areagotzeko eta eskaintza hori bertan behera geratzeko».

Arabiar aditu baten esanetan, Qatarrek bidalitako armak Turkiatik iristen zaizkie Anaia Musulmamen inguruko taldeei. Saudiarabiarrek -Jordaniatik-, berriz, nahiago dute Armadako iheslariek osatzen dituzten kontseiluak diruz eta armaz hornitu. Salafistei -Al Nosra frontea bezala-, berriz, Kuwait eta Arabiar Emirerri Batuetako erakundeek bidaltzen diete laguntza. Lehia komunikabideetan ere bada, batez ere Qatarreko Al-Jazeera eta saudiarren diruarekin ordaintzen den Al-Arabijaren artean, oposizioko talde ezberdinen bozgailua bihurtuz.