Iragarrita zegoen bezala, Estatu frantsesa hasi da Malitik soldaduak ateratzen. Urtarrilaren 11n, 4.000tik gora soldadu bidali zituen Bamako hiriburura jada gerturatzen ari ziren talde islamistei aurre egiteko. Bai Mujao talde islamistak bai tuaregek hainbat herri beren kontrolpean hartu zituzten. Urtarriletik hona borroka bortitzak egon dira. Talde armatuek gerrilla erako gerra batekin eta pertsonen kontrako minak jartzearekin mehatxu egin zuten.

«Duela astebete ehun bat soldadu eraman genituen Tessalitetik, Maliko ipar-ekialdean, Abiyanera, Boliko Kostan, eta astelehenean Ziprera iritsi ziren», azaldu zuen Thierry Burkhard koronelak, Armadaren Estatu Nagusiko bozeramaileak. Bertan hiru egun egongo dira Estatu frantsesera itzuli baino lehen. Paraxutisten unitatekoak ziren.

François Hollande presidenteak duela aste batzuk iragarri zuen soldaduak apirilaren amaieran ateratzen hasiko zirela. Esan zuenez, datorren uztailerako 2.000 soldadu geldituko dira Malin, bidalitakoen erdiak.

Uztailean presidentea eta legebiltzar berria hautatzeko hauteskundeak egitea nahi du Parisek. Ordurako segurtasuna Maliko segurtasun indarren esku utzi nahi du, baina modu egonkorrean mila soldadu utzi nahi ditu bertan. Hori proposatu zien pasa den astean Nazio Batuei eta Maliko Gobernuari.

Apirilaren 22an, Asanblea Nazionalak eta Senatuak Malin jarraitzeko baimena bozkatu behar dute, Konstituzioak hala aginduta.

Otsailean Laurent Fabius Atzerriko ministroak «Metro» egunkarian eginiko elkarrizketa batean aurreratu zuenez, «Frantziak ez du asmorik Malin modu egonkorrean gelditzeko. Maliarrek eta afrikarrek hartu behar dute orain segurtasunaren, subirotasunaren eta lurraldetasunaren ardura. Horregatik, pixkanaka Misma misio afrikarrari bide emango diogu. Iparraldean geldituko gara, oraindik talde terroristak baitaude. Baina, espero dut, martxotik aurrera soldadu frantsesen kopurua nabarmen murriztea».

«1.500 eta 2.000 terrorista artean identifikatu dituzte eta horietatik 600tik gora hil dituzte. Horrez gain, gordeta zituzten armak, munizioa eta erregaia deuseztatu dituzte, eta Abu Zeid bezalako buruzagi terroristak hilik daude», nabarmendu zuen Eric Denecek, espioitzari buruzko frantses ikerketa zentroko zuzendariak.

«Horrek ez du esan nahi mehatxua desagertu denik, baizik eta gutxitzea eta atzeratzea lortu» dela, gaineratu zuen.

Malin gelditu diren soldaduak Tombuctun eta Gaon ari dira borrokan gehienbat, bi gune horietan erresistentzia handia baitago, hein handi batean talde armatuek herritarren babesa dutelako eta beraien laguntzarekin ezkutatzea lortu baitute.

Nazio Batuak 11.200 «kasko urdin» bidaltzea eztabaidatzen ari dira. Ban Ki-moon idazkari nagusiak atzo ohartarazi zuenez, gatazka eskualdean zabaltzeko arrisku bizia dago.