Astelehenean izango dute lehenengo greba eguna Gipuzkoako metalgintzako langileek LAB sindikatuak egindako deialdiari UGT, CCOO eta ESK batu ostean. Uztailaren 7an dute begirada jarria, herrialdeko hitzarmen bat sinatu ezean, egun horretan galduko baitu indarra oraingoak. Orduan enpresa hitzarmenaren menpe geratuko lirateke, eta horren faltan, Estatu mailako esparruak araututako baldintzak ezarriko zaizkie. Herrialdekoak gutxiengo baldintzak bermatzen dituela azpimarratu zuten atzo Goierriko metalgintzako enpresa batzordeek, eta hori galtzeak lan baldintza kaskarragoetara kondenatuko dituela ohartarazi zuten atzo Beasainen egindako agerraldian.

Goierriko metal arloko enpresa garrantzitsuetako batzordeek egin dute bat greba deialdiarekin, besteak beste, CAF, Jaso, Arcelor, Tuermeco eta GH. Beste hainbat enpresatan atzo ziren bozketa egitekoak, beraz atxikimendu gehiago espero dituzte.

Beste eskualde batzuetan ere atxikimendua handia izan da eta mobilizazioa babesten dutenen artean daude Gamesa, Giroa, TS Fundiciones, Mendiola, Elevadores Goian, AGME, Biele, Tesa, Polmetasa, Ikor eta Fresmak, besteak beste.

Beasainen agertutako batzordeek azaldutakoaren arabera, hitzarmen sektorialak barnebiltzen dituen eskubide kolektiboak «determinanteak» dira metaleko langile guztientzat, bai enpresan negoziazio kolektiborako eskubiderik ez duten enpresa ertain eta txikientzat, baita enpresa eremuan hitzarmen propioa duten langileentzat. Horren adierazle da, enpresako hitzarmena duten zenbait batzordek ere greba babestu izana.

Izan ere, herrialdeko ituna enpresa arloko hitzarmenak negoziatzeko onarria izan da orain arte, eta hori galduz gero, baldintza kaskarragoetara joateko arriskua ikusten dute langileek.

«Hitzarmen sektoriala nahi dugu, blindatua, aberastasuna banatzen duena eta hori lortzeari begira, Adegik dituen asmoei aurre egin behar diegu, dugun indar guztiarekin», azpimarratu zuten.

Kohesioa Adegiren aurrean

Maiatzaren 24an egindako greba ekarri zuten gogora, eta orduan bezala, hurrengo astean ere -ekainaren 17, 19 eta 21erako deitu dute grebara- sektorea geldituko dutela ziurtatu zuten. «Kohesioa eta elkartasuna erakutsi genuen maiatzaren 24an, eta hurrengo egunetan izango diren greba egunei esker argi esan dezakegu gure eskuetan dagoela erreformari ateak ixtea», ohartarazi zuten.

Denbora gainera etortzen ari zaiela gogorarazi zuten eta Adegiren aurrean «parez pare» jarri beharra aldarrikatu zuten, «Rajoyk lapurtutako negoziazio kolektiborako eskubidea berreskuratzeko». Borroka horretan langileen arteko batasunak duen garrantzia azpimarratu zuten enpresa batzordeetako ordezkariek. «Langileen arteko banaketak Adegi babesten du, banaketak langileak ahultzen ditu», adierazi zuten. Ildo horretan, hilaren 17an eta 19an eskualdeko mobilizazioak egingo dituzte, besteak beste, Ordizia, Beasain, Hernani, Azpeitia, Tolosa, Eibar eta Errenterian, eta 21ean Donostian egingo dute manifestazioa Gipuzkoako enpresa batzorde guztiek.