Eibarretik eta Baionatik igaroz Iruñean bukatu dira UEUren udako ikastaroak, eta aurreneko balorazioa ona da, Irati Iciar antolatzailearen arabera. Orokorrean, ikastaldi arrakastatsua izan da aurtengoa. 40+1 ikastaldia planteatu zutenean, bi ideia zituztela azaldu du Iciarrek: «Bat, UEUren errekonozimendu kanpainarekin jarraitzea. Iaz diru laguntza galtzean udako ikastaroak erabili genituen errekonozimendua lantzeko 40. urteurrena aprobetxatuz. UEUrentzat kanpaina garrantzitsu bat izan zen. Aurten erakutsi nahi genuen krisian jarraitzen dugula, egoera delikatuan gaudela, eta horregatik erabili dugu 40+1 ideia, oraindik lanean jardun behar dugulako egoerari buelta emateko. UEUk lanean jarraitu behar du, beharrezkoa delako. Bigarren ideia, gure oinarri soziala berpiztea eta auzolanaren bitartez UEUren beharrezkotasun hori lantzen joatea da».

Beharrezkoa zergatik? Antolatzaileak argi du: «Euskal gizarteari zuzendutako goi mailako formazioa, unibertsitate mailako testu-materialak eta IKT proiektuak ekoizten dituelako, aditu euskaldunen topagunea delako, proiektu berrien mintegia, Euskal Unibertsitatearen bihotza eta, azken finean, euskara eta unibertsitatea uztartzen dituen proiektu soziala».

Izaera soziala indartu

Ikastaroak UEUko sailek eta bazkideek antolatu dituzte eta asko eskertzen diete denei, «UEUren orbitan» daudenei edota urtean zehar edo urteetan zehar profesionalki unibertsitate honekin lanean jardun dutenei bezala. Izaera soziala indartu nahi izan dute, ezaugarri garrantzitsuenetako bat.

Urtarrilean hasi ziren ikastaroak antolatzen, baina matrikulazioak dira ikastaldi bat baldintzatzen dutenak eta garrantzi handia du bazkideen bitartez egiten duten zabalkundeak. Azken urteetan konturatu dira ahoz aho egiten den publizitatea dela garrantzitsuena.