AZPEITIA
Cafe Baque taldearen nagusitasuna nabarmena izan zen atzo Urrakiko Igoeran (Euskaldun Txapelketa). Francisco Gutierrezek berriro erakustaldia eman zuen, eta garaipena poltsikoratu zuen Egoitz Murgoitio taldekidearen eta Ismael Estebanen (Alfus-Tedes) aurretik.Sekulako astea egin dute Zengotitabengoa eta Gorospe zuzendarien mutilek: Guti Legazpin gailendu zen astelehenean, eta herenegun Salasek eta Perezek Berriatuan eta Gironan irabazi zuten. Hortaz, lau garaipen zazpi egunetan; guztira, sei ditu taldeak.
Bi aldiz igo behar zuten Urraki txirrindulariek lasterketaren 37 kilometro betetzeko. Baquek ez zuen oztoporik nahi, eta horregatik aurreneko igoeran saiatu ziren multzoa apurtzen. Egia esan, lortu zuten erabat.
Lehendabiziko aldapan, Murgoitio atera zen tropeletik, baina ez zuen alderik lortu; Gutierrezek bai, ordea. Itzel aritu zen Zaldibarkoa eta gainetik 1.30 zuen. Atzetik, seikote bat osatu zen: Murgoitio eta Salas (Baque), Esteban (Alfus), Aperribai (Bidelan), De Miguel (Bruesa)eta Herrera (Lizarte).
Gutiri ez zion garaipenak ihes egin, eta Murgoitio izan zuen alboan podiumean, Legazpin bezalaxe.
Coruñako Itzulian Cubako Luis Romerok (Hierros Aguera) irabazi zuen; Odriozola (Bidelan) lehen euskalduna izan zen, seigarren sailkatu zen, Barrientos (Caja Rural) zortzigarrena izan zen eta Juez (Bidelan) hamargarrena. Azken etapa Magallanesek (Froiz) eskuratu zuen.
