DONOSTIA

Bakoitzak zilindro berria, kubikoa eta bola erabiliko ditu, eta hiruna minutuko txandak izango dituzte harri bakoitzarekin. Harri guztiak 125 kilokoak dira, beraz, jasoaldirik gehien ematen dituen harri-jasotzaileak eramango du txapela.

Harri guztiak aurretik pisatuko dira, eta horren ostean egindako zozketak erabakitzen duen moduan plazaratu beharko dute kirolariek. Sailkapenean berdinketaren bat izanez gero, lehian aurretik aritu dena geratuko da aurretik.

Sekulako ikusmina piztu duen lehiaketa da hau. Izeta II.ak txapelketa ofizialetan ez parte hartzeko erabakia hartu ostean, horrelako torneoetan ikusi ahal izango da bakarrik, eta bera eta Ostolatza aurrez aurre ikusteko jendea irrikaz dago. Gainera, Aimar Irigoien ere bertan izango da, eta hemen diren harriak aproposak dira beretzat. 125eko zilindroarekin lan ona egin zuen Gipuzkoakoharri txikien Txapelketan, eta gainerako harriak ere pisu berekoak direnez, aurrekoei lanak emateko prest agertuko da.

Hala ere, Izeta II.a eta Ostolatza dira garaipena eskuratzeko faboritoak. Zestoarrak lortu berria du Gipuzkoako txapela, eta bihar bide beretik jarraitu nahiko du, baina gainerakoak ere saiatuko dira, hori gerta ez dadin.

Saioa Larraitz auzoko plazan jokatuko da, baina eguraldi txarra egingo balu, pilotalekura pasako litzateke. Alegiara bertaratzen diren zaleek ez dute sarrerarik ordaindu beharrik izango, ikuskizuna dohainik izango baita. Jaialdian, gainera, aizkolariak ere izango dira ikusgai.